«Մեզ համար անբացատրելի է». Արդարադատության նախարարությունը՝ «Բաց հասարակության հիմնադրամներ-Հայաստան»-ի տարածած հայտարարության մասին

Քիչ առաջ, Բաց հասարակության հիմնադրամների Հայաստանյան գրասենյակի հաղորդակցության պատասխանատուն տարածեց հայտարարություն՝ վերնագրելով՝ «ՀՀ դատական իշխանությունում և դատաիրավական մարմիններում արդյունավետ վեթինգի ձախողման մարտահրավերի վերաբերյալ»։ Հայտարարության տակ ստորագրել են մի շարք կազմակերպություններ, իրավապաշտպաններ՝ քաղաքական իշխանությանը ներկայացնելով հետևյալ պահանջները. 1. Ըմբռնել, որ ժողովրդավարական, իրավական, ինքնիշխան և սոցիալական պետության վերականգնման գործողություններում հաջողության հասնելու անհրաժեշտ պայման է ամբողջական և խորքային վեթինգի իրականացումը դատաիրավական համակարգի բոլոր մարմիններում՝ անկախ համակարգային հետադիմական դիմադրությունից: 2. Վերանայել արդարադատության բարեփոխման իր թերի, ծայրահեղ անհամաչափ և անարդյունավետ մոտեցումները, միջազգային լավագույն փորձի կիրառմամբ անհապաղ նորոգել դատաիրավական համակարգում նոր Հայաստանի կարիքներին և պահանջին համահունչ վեթինգի օրենսդրությունը, այնուհետ անցնել վեթինգի իրականացմանը: 3. Իրականացնել առաջնահերթ վեթինգ Բարձրագույն դատական խորհրդի անդամների նկատմամբ, քանի որ այս մարմինն է լինելու բարեվարքության ստուգման վերջնական ատյանը դատավորների համար»,- ասվում է հայտարարության մեջ։ Ներկայացված պահանջների վերաբերյալ մեկնաբանություն ստանալու համար ԼՈՒՐԵՐ.com-ը դիմեց Արդարադատության  նախարար Ռուստամ Բադասյանի մամուլի խոսնակ Լուսինե Մարտիրոսյանին: Վերջինս նշեց, որ իրենց համար անբացատրելի է «Բաց հասարակության հիմնադրամներ-Հայաստան»-ի կողմից մի շարք հասարակական կազմակերպությունների և իրավապաշտպանների անունից տարածված հայտարարությունը. «Այն, ինչ անում ենք, նախատեսված է եղել Դատաիրավական բարեփոխումների ռազմավարությամբ, որն արժանացել է թե՛ միջազգային հանրության, թե՛ քաղաքացիական հասարակության, այդ թվում՝ հայտարարությունում նշված ՀԿ-ների դրական արձագանքին։ Ավելին, Դատական օրենսգրքի կարգավորումները ևս երկար ժամանակ հանրային քննարկում են անցել, և նման դիրքորոշում չենք ստացել, հետևաբար այս փուլում նման հայտարարությամբ հանդես գալը, չենք կարող բացատրել, թե ինչով է պայմանավորված։ Հ․Գ․ 2. Բազմիցս նշել ենք, որ որոշ առաջարկվող կարգավորումներ հնարավոր են բացառապես սահմանադրական բարեփոխումների արդյունքում»,- նշեց նա: Նշենք, որ «Բաց հասարակության հիմնադրամներ-Հայաստան»-ի կողմից տարածված հայտարարության տակ ստորագրել են հետևյալ Հ/Կ-ներն ու փաստաբանները՝ Հելսինկյան քաղաքացիական ասամբլեայի Վանաձորի գրասենյակ ՀԿ, Բաց հասարակության հիմնադրամներ- Հայաստան, Ժուռնալիստների «Ասպարեզ» ակումբ, «Իրավունքների պաշտպանություն առանց սահմանների» ՀԿ, Իրավունքի պաշտպանության և զարգացման հիմնադրամ, «Թրանսփարենսի ինթերնեշնլ» հակակոռուպցիոն կենտրոն, Ռոբերտ Ռևազյան՝ փաստաբան, Կարեն Թումանյան՝ փաստաբան: