ՀԽ գյուղատնտեսական հանձնաժողովը հիմա աշխատում է այնպես, ինչպես Վազգեն Մանուկյանի ժամանակ էր աշխատում

Արտակարգ դրությամբ պայմանավորված՝ մի շարք հաստատություններ, այդ թվում՝ պետական կառավարման համակարգի, անցել են հեռավար աշխատանքի: Այն մասին, թե այս ընթացքում ինչպես են կազմակերպվում Հանրային խորհրդի աշխատանքները՝ ԼՈՒՐԵՐ.com-ի թղթակիցը փորձեց պարզել  խորհրդի գյուղատնտեսական հարցերով հանձնաժողովի նախագահ Վարդան Համբարձումյանից։ «Մենք օնլայն հարթակում ենք կազմակերպում հանդիպումներ, քննարկումներ: Փորձում ենք զրուցել տարբեր ոլորտների ներկայացուցիչների հետ՝ հասկանալու համար նրանց խնդիրները: Իրականում, ավելին չենք էլ կարող անել, քանի որ Հանրային խորհուրդը հավաքական է, որը աշխատում է նիստերի միջոցով, այսինքն՝ հրավիրվում է հանձնաժողովի նիստ, քննարկվում հարցեր»,-ասաց նա: Համբարձումյանի խոսքով՝ իր ղեկավարությամբ գործող հանձնաժողովի նիստին պետք է մասնակցեն նաև մարզերի ներկայացուցիչներ, ովքեր ներկայացնում են իրենց խնդիրները կամ առաջարկները: «Հանրային խորհուրդը  համարյա ամեն ամիս ունենում էր ընդլայնված կազմով նիստ, սակայն հիմա դա անհնար է կազմակերպել: Մեզ մոտ լինում էին նաև արտահերթ նիստեր, երբ հարկ էր լինում ինչ-որ կարևոր հարց քննարկել, նման վերջին դեպքը կապված էր սպանդանոցների խնդրի հետ»,-ընդգծեց նա: Համբարձումյանի հավաստմամբ, իրենք ինչպես աշխատել են Վազգեն Մանուկյանի նախագահության ժամանակ, այնպես էլ հիմա են աշխատում՝ Ստյոպա Սաֆարյանի նախագահությամբ. «Այժմ, իրավիճակով  պայմանավորված,  գյուղատնտեսական հարցերով հանձնաժողովն էլ ավելի ակտիվ է աշխատում, քանի որ մեզ շատ են դիմում տարբեր հարցերով, մենք էլ փորձում ենք օգտակար լինել, որևէ կերպ աջակցել այդ մարդկանց: Ու ցանկացած պարագայում, պետք է այդպես էլ լիներ»: Հարցին, թե ՀԽ մյուս հանձնաժողովներն աշխատո՞ւմ են, թե ոչ, նա պատասխանեց. «Որքանով տեղյակ եմ, կան հանձնաժողովներ, որոնք նորմալ աշխատում են, իհարկե ստեղծված պայմաններից ելնելով՝ որոշ դժվարություններ կան, օրինակ՝ որոշումներ կայացնելու համար պետք է նիստ կազմակերպենլ որը լրացուցիչ դժվարություն է, բայց, ընդհանուր առմամբ, համոզված եմ, որ հանձնաժողովները աշխատում են»: