Մենք երբեք չպետք է մոռանանք Հայոց ցեղասպանության զոհերի մասին․ Ջասթին Թրյուդո

Կանադայի վարչապետ Ջասթին Թրյուդոն Հայոց ցեղասպանության 105-րդ տարելիցին միանում է Կանադայի և ամբողջ աշխարհի հայ համայնքներին՝ հարգելու Մեծ եղեռնի զոհերի հիշատակը, ում մասին երբեք չպետք է մոռանալ։ Այս մասին Թրյուդոն գրել է Twitter-ի իր էջում։

«Մենք երբեք չպետք է մոռանանք Հայոց ցեղասպանության զոհերի մասին։ Այս հանդիսավոր օրը մենք վերահաստատում ենք մեր հանձնառությունը՝ կառուցելու մի աշխարհ, որտեղ յուրաքանչյուրը կարող է ապահով զգալ իրեն խտրականությունից և հետապնդումներից՝ անկախ նրանից, թե ով է նա, որտեղից է և ինչին է հավատում», - գրել է Կանադայի վարչապետը:

Թրյուդոն հանդես է եկել նաև հայտարարությամբ, որտեղ ասվում է.

«Այսօր մենք միանում ենք Կանադայի և ամբողջ աշխարհի հայկական համայնքներին՝ ոգեկոչելու և հարգելու Հայոց ցեղասպանության զոհերի հիշատակը` պատմության մութ շրջան, որը մենք երբեք չպետք է մոռանանք:

Այս հանդիսավոր օրը մենք հարգանքի տուրք ենք մատուցում նրանց, ովքեր անարդարացիոորեն տուժեցին և իրենց կյանքը կորցրեցին այս ողբերգական շրջանի արդյունքում: Մենք նաև հարգում ենք նրանց սերունդներին, այդ թվում նաև հայկական արմատներով կանադացիներին, ովքեր այդքան մեծ ներդրում են ունեցել մեր երկրի հզորացման գործում:

Երբ մենք գիտակցում ենք հայ ժողովրդի ուժն ու ոգին, մենք նաև հույսով ակնկալում ենք խաղաղության և փոխադարձ հարգանքի ապագա:

«Ատելությունն ու բռնությունը երբեք չպետք է անտարբերության մատնվեն: Այսօր մենք վերահաստատում ենք մեր պատրաստակամությունը՝ կառուցել մի աշխարհ, որտեղ յուրաքանչյուրը կարող է խտրականությունից և հետապնդումներից ապահով զգալ` անկախ նրանից, թե ովքեր են նրանք, որտեղից են նրանք կամ ինչին են հավատում»: