Մարդկանց լույսն ու գազը անջատել են, ոնց չբողոքենք. բողոքի ակցիա

Հեղափոխության համար Ռուսաստանի Դաշնությունից Հայաստան եկած Էդգար Բաբայանն այսօր կառավարության շենքի առաջ բողոքի ակցիա իրականացնողներից մեկն է: Նա և իր երեք ընկերները դժգոհում են արտակարգ դրության ընթացքում իրականացվող աջակցման սոցիալ-տնտեսական ծրագրերից:  «Մեր բողոքը հատկապես վերաբերվում է կոմունալ վճարումներին: Մարդկանց թողեցին առանց լույս էս օրով: Իշխանության բոլոր ծրագրերը զրո  էֆեկտիվություն ունեն: Անիմաստ ծրագրեր են առաջարկում վարչապետին»: Նույն պահանջով երեկ կառավարության դիմաց ակցիա է իրականացրել ևս մեկ մարդ, նրան, սակայն ձերբակալել են, պնդելով՝ տեղաշարժման թերթիկում նշված նպատակը հրատապ չէ: «Երեկ ձերբակալել են մեկին, այսօր տասը կլինենք, վաղը՝ քսան: Մեր բերած իշխանությունն է, ես վստահում եմ վարչապետին, բայց լռել չեմ կարող այլևս: Ես հանուն հեղափոխության եկել եմ Հայաստան, ես հավատացել եմ, որ ունենալու ենք լավ երկիր, քաղաքացիակենտրոն պետություն: Փաշինյանի ու հաղթանակած հեղափոխության պատվին՝ 2018թ-ի մայսիսի 9-ին ծնված դստերս անվանակոչել եմ Ռուզաննա-Նիկոլ: Մեր իշխանությունն է ու մենք պիտի պահանջենք իրենց լավ աշխատել»: Նշենք, որ նստացույց իրականացնող քաղաքացիների տեղաշարժման թերթիկները ոստիկանները ստուգեցին և նրանք  հենց այս պահին կառավարության շենքի մոտ են: Նրանց միակ նպատակը կառավարությանը հասկացնել, որ սխալ են աշխատում: