Արարատի մարզպետն աշխատանքային առաջին օրվանից զբաղված է մարզում բանսարկություններ տարածելով․ Ավշարի համայնքապետարան

Հայաստանի Հանրապետությունում իշխանության փոփոխությունից հետո, Արարատի մարզպետի պաշտոնը զբաղեցրեց մի անձնավորություն, ով չի տիրապետում, թե ի՞նչ գործառույթներ պետք է իրականացնի ի պաշտոնե: Այս մասին հայտարարություն է տարածել Ավշարի համայնքապետարանը՝ Facebook-ի իր էջում:

Հայտարարությունում նաեւ ասվում է.

«Օրենքով նախատեսված իր գործառույթները կատարելու փոխարեն մարզպետը աշխատանքային առաջին օրվանից՝ զբաղված է մարզում բանսարկություններ, ու զրպարտանքներ տարածելով, եւ մարդկանց իրար դեմ չարացնելով:

Մարզպետի գործողությունները իրեն բացահայտեցին նաեւ այն ժամանակ, երբ վերջինս Ավշարի հին դպրոցի շենքի մասին, որը 3-րդ եւ 4-րդ կարգի վթարային շենք է, զրպարտչական բնույթի տեղեկություն ուղարկեց Հայաստանի Հանրապետության Դատախազություն, իբր ենթադրյալ հանցագործություն է հայտնաբերել, ինչի հիման վրա Արարատի տարածքային ոստիկանության կողմից մի քանի ամիսներ իրականացվեցին ոստիկանական գործողություններ, ստուգելով համայնքապետարանի կողմից հին դպրոցի շենքի վերաբերյալ անցյալ տարիներին օրենքով սահմանված կարգով կատարած գործողությունները:

Ամիսներ շարունակ տեւած ստուգումների արդյունքում՝ պարզվեց, որ այն ժամանակվա համայնքապետարանի կատարած գործողություններում հանցակազմ կամ օրենքի խախտումներ չկան:

Հետեւաբար այդ գործը պետք է կարճվեր եւ պատասխանատվության ենթարկվեր զրպարտիչը:

Հետագայում տեղեկացանք, որ ոստիկանությունը գործը ուղարկել է Արարատի մարզի քննչական կոմիտե, որտեղ եւս կատարվեցին բազմաթիվ քննչական գործողություններ, որոնք տեւեցին մի քանի ամիսներ, քննիչի կողմից կայացվեց որոշում՝ հանցակազմի բացակայության հիմքով՝ կարճել քրեական գործը:

Քննիչի կողմից կայացված օրինական որոշումը բողոքարկվեց, ինչի հմիան վրա քննիչի որոշումը վերացվեց եւ նույն քննիչի կողմից սկսվեցին ավելի լայնածավալ քննչական նոր գործողություններ:

Քննչական երկրորդ կամ կրկնակի գործողությունները տեւել են մի քանի ամիսներ, ավելի շատ քան առաջին քննչական գործողությունները:

Երկրորդ քննչական գործողությունների ավարտից հետո քննիչի կողմից որոշում կայացվեց՝ հանցակազմի բացակայության եւ վաղեմության ժամկետի հիմքերով քրեական գործը կարճել:

Վստահ եմ նաեւ, որ ուղղակի կամ անուղղակի եղանակով դեռեւս շարունակվելու է զրպարտչական բնույթի գործողությունների կատարումը, սակայն հայտնում եմ, որ դա ցանկալի արդյունք չի տալու»: