Արևմուտքի ռազմական գործողությունները Իրանի դեմ կբերեն Թեհրանի կողմից միջուկային զենքի ստեղծման

Արևմուտքի կողմից Իրանի նկատմամբ հնարավոր ռազմական գործողությունները գործնականորեն անխուսափելի կդարձնեն Թեհրանի կողմից միջուկային զենքի ստեղծումը. գրում է ИТАР-ТАСС-ը՝ հղում անելով Financial Times-ին։

«Թեհրանին միջուկային զենք ստեղծելու անհրաժեշտության մեջ համոզելու մի վստահելի տարբերակ կա. Իսրայելի հարձակումը Իրանի վրա»,- իր հոդվածում գրում է քաղաքական վերլուծաբան Ֆիլ Ստիվենսը։

«Ներխուժելով Իրաք՝ Արևմուտքը սխալ քայլ կատարեց, քանի որ չէր մտածել իր գործողությունների հետևանքների մասին։ Այժմ  նմանատիպ իրավիճակ է ձևավորվում Իրանի շուրջ»։

Պարզ է, որ իր միջուկային օբյեկտների վրա հարձակման դեպքում Իրանը կարձագանքի անմիջապես մի քանի ուղղություններով, գրում է հեղինակը։ Այսպես փակման վտանգի առջև կկանգնի համաշխարհային էներգետիկ շուկայի համար կարևորագույն նշանակություն ունեցող Հորմուզի ջրանցքը, Թեհրանը կարող է աջակցություն ցուցաբերել մի շարք ահաբեկչական խմբավորումների, այդ թվում՝ աֆղանական թալիբներին։

Հաջորդ հետևանքը կլինի այն, որ Իրանը դուրս կգա միջուկային զենքի չտարածման պայմանագրից։ Վերլուծաբանի կարծիքով Իրանը ներկայումս տարածաշրջանում խիստ ճնշման տակ է, ինչը կապված է նաև Սիրիայի իրադարձությունների հետ։
Այս պայմաններում Արևմուտքը պետք է այնպիսի քաղաքականություն որդեգրի, որի դեպքում Իրանը իրեն անվտանգ կզգա նույնիսկ առանց միջուկային զենքի։
«Ինչ վերաբերում է Իրանի վրա հարձակմանը, ապա դա կբերի հակառակ արդյունքների»,-ամփոփում է վերլուծաբանը։