Նոր սանկցիաներ՝ Իրանի նկատմամբ

Մեծ Բրիտանիան, Ֆրանսիան և Գերմանիան կոչ են արել ԵՄ երկրներին նոր պատժամիջոցներ կիրառել Իրանի նկատմամբ՝ նրա միջուկային ծրագրի հետ կապված: Ինչպես հայտնում է Գերմանիայի ԱԳ նախարար Գիդո Վեստերվելեն, այդ քայլը պետք է իրականացվի որքան հնարավոր է արագ, քանի որ Իրանը «չի ցուցաբերել կառուցողական մոտեցում» բանակցությունների ընթացքում:

Արտաքին գործերի գերատեսչությունների ղեկավարների միասնական հայտարարությունն արվել է Ուիլյամ Հեյգի, Լորան Ֆաբիուսի և Գիդո Վեստերվելեի՝ Կիպրոսի Պաթոս քաղաքում կայացած ոչ պաշտոնական հանդիպման ժամանակ:

ԵՄ-ն և ԱՄՆ-ն կասկածում են, որ Իրանը վարում է միջուկային զենքի զարգացման ծրագիր: Թեհրանը ժխտում է այդ մեղադրանքները և պնդում, որ նրա միջուկային ծրագիրը կրում է բացառապես խաղաղ բնույթ:

Հիշեցնենք, որ ավելի վաղ Lurer.com-ը հայտնել էր, որ Թեհրանում իր գործունեությունը դադարեցրել է Կանադայի դեսպանությունը, իսկ Կանադայում իրանցի դիվանագետները հայտարարվել էին persona non-grata: Օտտավան իր որոշումը ներկայացրել է իբրև բողոքի նշան՝ Իրանի կողմից Սիրիայի նախագահ Ասադի վարչակարգին զենքի մատակարարելու դեմ։