Նախկին և ներկա պաշտոնյաները քանդում են «տուշոնկա» օպերացիայի միֆը

Իշխանության նախկին և գործող ներկացուցիչների հրապարակային ելույթները շարունակում են ապացուցել, որ Արցախի հերոս Մանվել Գրիգորյանի դեմ հարուցված քրեական գործի օրինականությունը բազմաթիվ հարցեր է առաջացնում և, որ իշխանությունները, մեղմ ասած, սխալ են վարվել գեներալ-լեյտենանտի հետ` նպատակային կերպով նրան տանելով մահվան:

ԱԺ-ում  ԲԴԽ նախագահի պաշտոնակատար Գագիկ Ջհանգիրյանը խոսելով գեներալ Մանվել Գրիգորյանի գործի մասին հայտարարել է, որ «փուչիկը հենց սկզբից էլ շատ փչեցին, խտացրած կաթի և տուշոնկաների հետ ինքը կապ չի ունեցել»։ Մանվել Գրիգորյանը անուրանալի ներդրում է ունեցել Արցախի ազատագրման խնդրում․ «Ես կարծում եմ այն ժամանակ իր հանդեպ այդ պրոցեսը ծուռ է գնացել»,- հայտարարել է Ջհանգիրյանը։ 

Մանվել Գրիգորյանի շուրջ ծավալված «տուշոնկա շոուի» մասին խոսել են նաև ԱԱԾ երկու նախկին պետերը՝ Արթուր Վանեցյանը և Միքայել Համբարձումյանը: Առաջինը հայտարարել էր, որ «տուշոնկա շոուի» մասով հարցերը պետք է ուղղվեն իշխանություններին, և թեև նրանք ունեն որոշակի ցանկություն իրեն մեղադրել այս գործում, սակայն Մանվել Գրիգորյանին կալանավորելու որոշումը կայացրել է ՀՔԾ-ն: Արթուր Վանեցյանը բազմիցս է ակնարկել, որ ՀՔԾ ղեկավարությունը կատարում է քաղաքական իշխանությունների պատվերը, և հղում անելով ՀՔԾ-ին Վանեցյանը ի ցույց է դնում, որ գործ ունենք նմանատիպ իրավիճակի հետ:

Միքայել Համբարձումյանը, ով նույնպես անչափ բարձր է գնահատել Մանվել Գրիգորյանի ավանդը, հարցազրույցներից մեկում հայտարարել էր, որ իրենք, ասել է թե՝ ԱԱԾ-ն Մանվել Գրիգորյանի տուն էին գնում զենք-զինամթերք հայտնաբերելու համար, սակայն ամեն բան հանգեցրին «տուշոնկա շոուի»՝ տանելով իրենց ձեռնտու հուզական հունով:

Ինչպես տեսնում ենք՝ Նիկոլ Փաշինյանի նախկին և ներկա թիմակիցները ուղղակի կամ անուղղակի կերպով մատնացույց են անում այն հանգամանքը, որ Մանվել Գրիգորյանին ներկայացված մեղադրանքը անհիմն էր, «շատ փչված փուչիկ», որն անշուշտ պայթելու է, քանի որ արդարությունը միշտ էլ ի վերջո հաղթում է:  Գրիգորյանը անազատության մեջ գտնվեց մեկուկես տարի: 2020 թվականի հունվարի 15-ին խափանման միջոց կալանքը փոխարինվեց չհեռանալու մասին ստորագրությամբ, սակայն մեղադրանքը չի հաստատվել անգամ նրա  մահից հետո: Պատեհ և անպատեհ առիթներով մարդու հիմնարար իրավուքներից խոսող իշխանությունները հաշվի չառան անգամ Գրիգորյանի ծանր առողջական վիճակը և արգելեցին նրան մեկնել բուժման: Առողջական վիճակը, սակայն, չխանգարեց Մանվել Գրիգորյանին՝  պատերազմի առաջին օրերից սայլակով մեկնել ռազմաճակատ, որտեղ էլ նրա վիճակը ավելի վատացավ: Հոկտեմբերի վերջին Գրիգորյանը արդեն վերակենդանացման բաժանմունքում էր, որտեղ էլ ստանալով կապիտուլյացիոն ակտի կնքման լուրը՝ մահացավ: Արցախի հերոսի սիրտը պարզապես չդիմացավ՝ իր և զինակից ընկերների կողմից ազատագրված հայրենիքի՝ թշնամու ձեռքում հայտնվելու լուրին...