Ես չգիտեմ՝ «Հայկական ժամանակ»-ին որտեղի՞ց այդպիսի տեղեկատվություն․ Հովիկ Աղազարյան

«Ես չգիտեմ՝ «Հայկական ժամանակ»-ին որտեղի՞ց այդպիսի տեղեկատվություն։ Ես ոչ թե հետաձգել եմ մանդատս վայր դնելու մասին որոշման հայտարարությունը, այլ վարչապետի խնդրանքին արձագանքելու մասին որոշումը։ Դրանք տարբեր բաներ են»,- այսպես է արձագանքում Euromedia24.com-ի հետ զրույցում ՔՊ-ական պատգամավոր Հովիկ Աղազարյանը՝ վարչապետի ընտանիքին պատկանող ՀԺ-ի ձևակերպմանը, որտեղ նշվում է, որ Աղազարյանը հետաձգել է մանդատը վայր դնելու որոշումը։

Հետաքրքրվեցինք՝ չի՞ կարծում, որ սրանով իրեն մեսիջ են հղում և պարտադրում, որ վայր դնի մանդատը՝ Աղազարյանն ասաց․ «Հարմար չեմ գտնում մեկնաբանել, դուք ինչպես ուզում եք՝  մեկնաբանեք»։

Ինչ վերաբերում է մանդատը վայր դնելու պատճառներին, ապա Աղազարյանն ասաց, որ Փաշինյանն արդեն հայտարարել է այդ մասին․ «Հայտարարել է, որ ԱԺ-ում իմ և պարոն Քյարամյանի վիճաբանության մասով է նման խնդրանքով հանդես եկել»,- նշեց ՔՊ-ական պատգամավորը։

Դիտարկմանը, թե հաշվի առնելով Փաշինյանի համար վստահելի թեկնածուների պակասն ու առհասարակ կադրային ռեզերվի կրիզիսը, հնարավո՞ր է, որ «ռակիրովկա» կոչվածի կոնտեքստում իրեն ևս այլ պաշտոնի նշանակեն, միգուցե այս օրերին մանդատը վայր դնելու որոշումը հենց այդ սեպարատ բանակցությունների պատճառո՞վ է, Աղազարյանն ասաց․ «Այդ հարցադրումներին կկարողանամ պատասխանել այն ժամանակ, երբ կպատասխանեմ վարչապետի խնդրանքին։ Ներողություն եմ խնդրում, որ մի քիչ ուշացնում եմ, բայց դրա համար ես ունեմ հիմնավոր պատճառներ»,- եզրափակեց Աղազարյանը։ 

Հիշեցնենք` ՀՀ վարչապետ Նիկոլ Փաշինյանը Հանրային հեռուստաընկերությանը տված հարցազրույցի ժամանակ հայտարարել էր, որ ՔՊ պատգամավորներ Նարեկ Զեյնալյանին և Հովիկ Աղազարյանին խնդրել է` պատգամավորական մանդատները վայր դնել՝ հույս հայտնելով, որ Հովիկ Աղազարյանը կկատարի իր խնդրանքը։ Նոյեմբերի 22-ին Նարեկ Զեյնալյանը Աժ էր ներկայացրել մանդատը վայր դնելու դիմումը։ Իսկ Հովիկ Աղազարյանը հայտնել էր, որ նոյեմբերի 25-ին, ժամը 18:00-ին հայտարարությամբ հանդես կգա: Սակայն ժամկետը լրանալուն պես՝ հայտարարեց, որ հետաձգել է իր որոշման ընդունման ժամկետները։

Սոնա Հարությունյան