Խոշոր բիզնեսի նախկին և ներկա «փաստաբանները»

Վերջին շրջանում ՏՄՊՊՀ արձագանքը՝ շուկայում առկա գնաճին կամ հակամրցակցային որևէ դրսևորմանն այլևս չի զարմացնում: ՏՄՊՊՀ նախագահը գրեթե յուրաքանչյուր առիթ օգտագործում է արդարացնելու համար խոշոր տնտեսվարողների կողմից վարած քաղաքականությունը:

2021թ. օգոստոսին նախորդ տարվա նույն ամսվա համեմատ հանրապետությունում արձանագրվել է սննդամթերքի և ոչ ալկոհոլային խմիչքի 15.1% գնաճ։ Բանջարեղենի ապրանքախմբում նույն ժամանակահատվածում արձանագրվել է 66.4% գնաճ, միևնույն ժամանակ, մրգի ապրանքախմբում արձանագրվել է 8.7% գնաճ։ Ձկան և ծովամթերքի ապրանքախմբում արձանագրվել է 25.5% գնաճ։ Մսամթերքի ապրանքախմբում 9.9% գնաճ է արձանագրվել։ Օրինակ՝ խոզի մսի գնաճը 2021թ. օգոստոսին նախորդ տարվա նույն ժամանակահատվածի համեմատ կազմել է 40.3%։Կաթնամթերքն ու ձուն թանկացել են 12.2%-ով։ Ձվի գինը նախորդ տարվա օգոստոսի համեմատ աճել է 46.5%-ով։ Պատճառը, ըստ ՏՄՊՊՀ-ի, ոչ թե մենաշնորհներն են, այլ համավարակը, միջազգային շուկայում գների թանկացումը, ներմուծման հետ կապված խնդիրները, տարադրամի փոխարժեքի տատանումը և այլն: Ամեն ինչ, բացի հակամրցակցային քաղաքականությունից, որը ինչպես հասկանում ենք՝ Հայաստանում առկա է:

Ի՞նչ է փոխվել այս առումով Նոր Հայաստանում: Ոչինչ: Քանի որ նախկինում ՏՄՊՊՀ նախագահները նույն ավյունով կրկնում էին բառացիորեն նույն նախադասությունները՝ արդարացնելու համար երկրում հաստատված գնաճը: 2014 թվական, ՏՄՊՊՀ այն ժամանակվա նախագահ Արտակ Շաբոյանը հայտարարում էր, որ Հայաստանյան շուկայում այս պահի դրությամբ գնաճը համահունչ է փոխարժեքի փոփոխություններին: 2015-ին նույն Շաբոյանը հայտարարում էր՝ շաքարավազի շուկայում մենաշնորհ չկա, շուկայի 100 տոկոսը Ալեքսանյանինը չէ:

Շաքարավազի շուկայի մասին գրեթե նույն կարծիքն ուներ ՏՄՊՊՀ նախկին նախագահներից՝ Աշոտ Շահնազարյանը: Նա, մասնավորապես, հայտարարում էր, որ շաքարավազի ներկրումը, ստեղծվել է ազատ մրցակցության պայմաններում, որովհետեւ շատ բերելու դեպքում դրսում էժան են առնում:

Տպավորություն է, որ ՏՄՊՊՀ նախագահի աթոռը զբաղեցնող անձինք ընդհանրապես կորցնում են կապը իրականության հետ, և ապրում են մի իրականության մեջ, որտեղ չկա մենաշնորհ, որտեղ օլիգարխները չեն որոշում ՝ վաղը առաջին անհրաժեշտության ապրանքները ինչ գնով ենք գնելու, որտեղ գները միայն ու միայն կախված են միջազգային շուկայում արձանագրվող տենդենցներից: Իսկ ավելի կարճ ասած՝ Հայաստանի վրա ՏՄՊՊՀ նախագահ չի գալիս...