Նյու Յորքում հանդիպել են Իրանի և Ադրբեջանի ԱԳ նախարարները
ԻրանԻրանի արտգործնախարար Հոսեյն Ամիր Աբդոլահիանը և նրա ադրբեջանցի գործընկեր Ջեյհուն Բայրամովը ՄԱԿ-ի Գլխավոր ասամբլեայի շրջանակում հինգշաբթի օրը հանդիպում են ունեցել Նյու Յորքում:
Հանդիպման ընթացքում ադրբեջանցի բարձրաստիճան դիվանագետը ողջունել է Թեհրանում Իրանի, Թուրքիայի և Ադրբեջանի Հանրապետության եռակողմ հանդիպման անցկացումը:
Բայրամովը շնորհակալություն է հայտնել Իրանին՝ Ադրբեջանի Հանրապետության «տարածքային ամբողջականությանն» աջակցելու համար:
Ինչպես փոխանցում է «Թասնիմ» գործակալությունը, ադրբեջանցի նախարարը պատրաստակամություն է հայտնել Իրանի հետ համատեղ նախագծեր իրականացնել Կասպից ծովի տարածաշրջանում, ինչպես նաև զարգացնել քաղաքական և տնտեսական համագործակցությունը Թեհրանի հետ:
Իրանի ԱԳ նախարարն իր հերթին որակել է Իրանի և Ադրբեջանի Հանրապետության հարաբերությունները որպես չափազանց կարևոր և հույս հայտնել, որ նախկին պայմանավորվածությունները կյանքի կկոչվեն:
Աբդոլահիանը նշել է, որ Իրանի նոր վարչակազմը հատուկ առաջնահերթություն է տվել հարեւանների հետ հարաբերություններին:
Նա նաև նշել է, որ երկու երկրներն աջակցել են միմյանց միջազգային և տարածաշրջանային ֆորումներում, ընդգծել է այդ ոգու պահպանման անհրաժեշտությունը, երկու երկրների ընդհանրությունները բնութագրել որպես խորը և բազմազան, և ընդգծել, որ Իրանը միշտ պաշտպանել է Ադրբեջանի Հանրապետության տարածքային ամբողջականությունը:
Աբդոլահիանը այնուհետեւ անդրադարձել է Արցախի` Ադրբեջանի կողմից օկուպացված տարածքների վերակառուցմանը` որպես երկու երկրների միջեւ ծավալուն համագործակցության հիմք:
Նա նաև ընդգծել է, որ չպետք է թույլ տալ, որ որոշ երրորդ կողմեր ազդեն երկու հարևան պետությունների լավ հարաբերությունների վրա: