Ով՞ է պատասխան տալու քաղաքացիների՝ 1.5 տարվա թալանի համար

Առողջապահության նախարարությունն, ի պատասխան ՊՇՌ թեստերի գնագոյացման մասին հարցին, որ եթե COVID-19-ի դեմ ՊՇՌ թեստերի գները հնարավոր էր էժանացնել, ինչու՞ դա չէր արվում մինչև հոկտեմբերի 1-ը ուժի մեջ մտնող կարգավորումները, ո՞վ է գերշահույթ ստացել, պատասխանել է, որ հասկանալ, թե տվյալ կառույցները գերշահույթ են ապահովում, թե ոչ, առողջապահության նախարարության գործառույթն ու պարտականությունը չէ, և խնդրել են գնագոյացման վերլուծության համար դիմել ՀՀ տնտեսական մրցակցության պաշտպանության պետական հանձնաժողով: 

Նշենք, որ ՊՇՌ թեստերի շուրջ 60 տոկոս գնանկում է տեղի ունեցել վերջին օրերին: Հիշեցնենք, որ մինչ այս` մեկ թեստավորումը արժեր 15000 դրամ: Այս ողջ քովիդային ժամանակահատվածում արվել է շուրջ 1 մլն 698 հազար թեստ: Եթե հաշվարկենք, որ թեստի ինքնարժեքը 3000 դրամ է (չհաշված, որ մեծաքանակ թիվ է կազմում նաև Հայաստանին անվճար տրամադրված թեստերի քանակը), ու այն կատարվում է 6- 7 հազար դրամով, ստացվում է, որ մեկ թեստից ավելի քան 12 հազար դրամ եկամուտ է ստացվել, երբ մեկ թեստավորման համար պահանջում էին 15 հազար դրամ: Հիմա զուտ հաշվարկ. 12000x1600000=19 մլրդ 200 մլն դրամ, շուրջ 38 մլն ԱՄՆ դոլար: 

Ստեղծված իրավիճակում առողջապահության նախարարությունը փորձում է ողջ պատասխանատվությունը գցել ՏՄՊՊՀ-ի գրպանը, մինչդեռ ակնհայտ է, որ 1.5 տարի քաղաքացիներին կեղեքելը արտոնելու և դրա վրա աչք փակելու մեջ մեղավոր է և նախարարությունը, որը, ըստ էության աչք է փակել գերշահույթ ստացող՝ թեստերը ներմուծող և վաճառող ընկերությունների վրա, և ՏՄՄՊՀ-ն, որը առաջնորդվում է մեկ կարգախոսով՝ Հայաստանում չկա մենաշնորհ և չկան գերշահույթ ապահովող տնտեսվարողներ: Արդյունքում՝ 1.5 տարի ՀՀ հպարտ քաղաքացիները թալանվել են: