Ինչքա՞ն կարելի է ծածկադմփոց անել ու մատի վրա ֆռացնել մարդկանց. Աննա Կոստանյան

ԱԺ նախկին պատգամավոր Աննա Կոստանյանը ֆեյսբուքյան իր էջում գրել է. «Ինձ ապշեցնում է իշխանական պատգամավորների ու մերձավորների կողմից Ադրբեջանի քայլերի սրբագրմանն ու արդարացմանն ուղղված «ծանր հրետանու» անխնա աշխատանքը։ Տարածաշրջանային լարվածության ֆոնին հանկարծ միջազգային քաղավիացիայի կոնվենցիա են հիշել (իբր թե մինչև հիմա գիտեին դրա տեղը), հիշել են, որ Ադրբեջանը երբեք իր օդը փակած չի եղել քաղաքացիական օդանավերի համար։ Սրան զուգահեռ մեկ էլ հայատյաց Ալիևը հայտարարում է, թե Ադրբեջանի և Հայաստանի միջև հաղորդակցությունների բացման գործընթացը «մասամբ սկսվել է»։ Հիմա սա զուգադիպությու՞ն էր, թե՞ երջանիկ պատահականություն, որ Իրանի կողմից Ադրբեջանի ռազմական օդանավերի ուղին փակվեց, ու հանկարծ Ադրբեջանն սկսեց օգտագործել հայկական օդը՝ ուղևորափոխադրումների համար, որից հրաժարվել էր դեռ 2014-ին։
Վերջապես բավարար համարձակություն գտեք պարզ ասելու կատարվող գործընթացների մասին։ Արդեն հոգնել ենք դաշտ նետվող տարատեսակ մանիպուլատիվ ինֆոներից ու անհոդաբաշխ, վախվորած, մեկը մյուսին հակասող պատճառաբանություններից։ Ինչքա՞ն կարելի է ծածկադմփոց անել ու մատի վրա ֆռացնել մարդկանց։
Լավ, ո՞վ ա ձեր լեզվից քաշում ամեն անգամ մի վնասող արտահայտություն անեք»։