Թուրքմենստանում կմարեն «Դժոխքի դարպասներ» գազային խառնարանը (լուսանկարներ)

Թուրքմենստանի նախագահ Գուրբանգուլի Բերդիմուհամեդովը կառավարությանը հանձնարարել է մարել ավելի քան 50 տարի այրվող խառնարանը, հայտնում է turkmenportal.com-ը։

Երկրի ղեկավարը նշել է, որ «երկար տարիներ այս տարածքում այրվում է հսկայական քանակությամբ գազ, ինչը բացասաբար է անդրադառնում տարածաշրջանի էկոլոգիայի ու բնակչության առողջության վրա»։

Թուրքմենստանի փոխվարչապետին հանձնարարվել է ներգրավել գիտնականների, իսկ անհրաժեշտության դեպքում՝ օտարերկրյա մասնագետների՝ լուծում գտնելու համար։

Խառնարանի փակման հարցը առաջին անգամ բարձրացվել է Թուրքմենստանի նախագահի կողմից 2010 թվականին։

Նշենք, որ այրվող գազային խառնարանը, որը ժողովրդի շրջանում հայտնի է «Դժոխքի դարպասներ» անունով, գտնվում է Կարակում անապատի կենտրոնում՝ Աշխաբադից մոտ 260 կիլոմետր հյուսիս։

1971-ին սովետական ​​երկրաբանները հայտնաբերեցին այս տարածքում բնական գազի կուտակում, և բացելով հորատանցք՝ փլուզում առաջացրին. հողի վերին շերտերը պարզապես փլուզվեցին ստորգետնյա քարանձավի մեջ՝ բացելով գազով լցված մեծ փոս: Մարդկանց և անասունների գազից թունավորումներից խուսափելու համար երկրաբանները որոշեցին այն հրկիզել՝ հավատալով, որ ժամանակի ընթացքում կրակը կհանգչի։ Սակայն արտահոսող գազը շարունակում է այրվել մինչ օրս։

Անցքի տրամագիծը 60 մետր է, խորությունը՝ մոտ 20 մետր։