Որ պաշտոնյաներն են Փաշինյանին «բռնել» ոչ պրոֆեսիոնալիզմի վրա

Թեև իշխանության ներսում արմատացել է կարծիքը, որ Փաշինյանն անսխալական է և վերջինիս քննադատել չի կարելի, այնուամենայնիվ կան պաշտոնյաներ, ովքեր թեկուզ և տողատակով, սակայն մեղադրում են Փաշինյանին ոչ պրոֆեսիոնալիզմի և դրա արդյունքում առաջացած խնդիրների մեջ:

Դիցուք՝ ՀԾԿՀ նախագահ Գարեգին Բաղրամյանն իր հարցազրույցներից մեկում հայտարարել է, որ եթե չլիներ վերջերս ռուսական կողմի հետ բանակցած պայմանագրում առկա կետը գազի կալորիականության հաշվարկի մասին, ապա «Գազպրոմ Արմենիա»-ի՝ գազի սակագինը բարձրացնելու հայտը կարող էր մերժվել, քանի որ բերած մյուս բոլոր հիմքերը բավական թույլ են: Այսինքն, ստացվում է, որ Նիկոլ Փաշինյանն է մեղավոր թույլ բանակցություններ վարելու և արդյունքում ոչ շահավետ պայմանագիր կնքելու մեջ:

Էկոնոմիկայի նախարար Վահան Քերոբյանը, ով վերջերս հաճախ է խոսում գնաճից և գյուղատնտեսությանը սպասվող վտանգներից, ընդունել է, որ դա արդյունք է կառավարության ընդունած մի շարք որոշումների: Դիցուք՝  թուրքական ապրանքների ներկրման էմբարգոն հանելը, ինչին ինքը նախարարը, ի դեպ, դեմ էր և Հայաստանում սահմանված սահմանափակումները, որոնք էական հարված են հասցնում տնտեսվարողներին:

Սփյուռքի գործերի գլխավոր հանձնակատար Զարեհ Սինանյանն իր հարցազրույցներից մեկում նշել էր, որ խոստացված հայրենադարձությունը տեղի չունեցավ օբյեկտիվ և սուբյեկտիվ մի շարք պատճառներով, որոնցից էր նաև կառավարության որդեգրած սխալ քաղաքականությունն այս հարցում: Շատերի համար հատկապես զարմանալի էր Փաշինյանի մտերիմ համարվող Սինանյանի կողմից նման թիրախավորված մեղադրանքը, սակայն, այն փաստ է:

Համավարակի ամենաթեժ պահին, երբ առողջապահության նախարարի պաշտոնը զբաղեցնում էր դեռևս Արսեն Թորոսյանը, բավական ուշագրավ մի դրվագ արձանագրվեց; Վարչապետ Փաշինյանն ամենօրյա ասուլիսների ընթացքում հայտարարում էր, որ համավարակի ընթացքը կառավարելի է, և կառավարությունն` ի դեմս իրեն, անում է ամեն բան՝ տարածումը կանխելու համար: Իր հերթին` Արսեն Թորոսյանն ասուլիսներից մեկում փաստացի մեղադրեց Փաշինյանին ոչ պրոֆեսիոնալիզմի և կառավարման վատ որակների մեջ` հայտարարելով, որ համաճարակային իրավիճակը դուրս է եկել վերահսկողությունից, և Փաշինյանն, ըստ էության, մոլորեցնում է հանրությանը:

Կառավարության նախորդ տարվա սեպտեմբերի 10-ի նիստում վարչապետ Նիկոլ Փաշինյանը, խոսելով երկրում սոցիալական վիճակի մասին, հայտարարեց, որ այդ տարվա հուլիսին աշխատողների թվաքանակի և միջին աշխատավարձերի գծով գրանցվել է նկատելի աճ։  Սակայն,  ըստ ԱՎԾ տվյալների՝ այդ տարվա հուլիս ամսին հանրապետությունում գրանցված աշխատողների թվաքանակը եղել է 632,410, ինչը մոտ 19,350-ով ավել է Փաշինյանի ներկայացրած ցուցանիշից։ Վարչապետն իր խոսքում աշխատողների այդ տարվա թվաքանակը համեմատել էր նախորդ տարվա հետ և հայտարարել, որ այս ցուցանիշը մոտ 6600-ով ավել է նախորդ տարվա ցուցանիշից։ Ստացվում է, որ, ըստ վարչապետի, նախորդ տարվա հուլիսին Հայաստանում գրանցված աշխատողների թվաքանակը եղել է ավելի քան 606,400։ Սակայն այստեղ ևս Նիկոլ Փաշինյանի հրապարակած թվերը չեն համապատասխանում պաշտոնական վիճակագրությանը։ Ըստ ԱՎԾ տվյալների՝ 2019 թ. հուլիսին երկրում կար մոտ 603 հազար գրանցված աշխատող։ Ըստ էության, ԱՎԾ պետ Ստեփան Մնացականյանն իր հաշվետվությամբ բացահայտեց Փաշինյանի ոչ պրոֆեսիոնալիզմը, այս դեպքում նաև սուտը...

Ինչպես տեսնում ենք՝ վարչապետին ոչ պրոֆեսիոնալիզմի վրա բռնեցրած պաշտոնյաների պակաս չի զգացվում, և թեև նրանցից ոչ մեկ ուղղակիորեն չի թիրախավորել վարչապետին, սակայն պարզից էլ պարզ է, որ հիմնական մեսիջն ուղղված էր հենց Նիկոլ Փաշինյանին, ով, ըստ տվյալ պաշտոնյաների, և՛ թիվ մեկ մեղավորն էր, և՛ թիվ մեկ պատասխանատուն...