Բողոքի զանգվածային ցույցեր Իրանում

Իրանի արժութային շուկաներում դոլարի արտարժույթի տատանումների և ռիալի արժեքի անկման պատճառով Թեհրանի փողոցներում և շուկաներում մարդիկ են կուտակվել, որոնք անվադողեր են այրում և հակակառավարական կոչեր վանկարկում. հայտնում է Trend.az-ը` հղում կատարելով Mehr-ին:

Վերջինս հայտնում է, որ տեղական առևտրականները փակել են իրենց խանութները`անվտանգության նկատառումներից ելնելով: Լրատվական կայքը հայտնում է, որ մարդիկ դուրս են եկել փողոց այս չորեքշաբթի` կեսօրից հետո:

Իրանական շուկայում դոլարի արժեքը նորից բարձրացել է Իրանի նախագահ Մահմուդ Ահմադինեջադի երեկ տված մամուլի ասուլիսից հետո:
Ասուլիսից հետո դոլարի արժեքը սկսել է բարձրանալ՝ հասնելով 36 200 ռիալի:

Այս երկուշաբթի Իրանի ազգային արտարժույթը՝ ռիալը, դոլարի նկատմամբ անկում է ապրել 17 %-ով: Երկուշաբթի առավոտյան ԱՄՆ դոլարի արժեքը կազմել է 29 700 ռիալ, սակայն մինչ երեկո կտրուկ աճել է մինչև 35 500 ռիալի: Սրա արդյունքում երկրի քաղաքացիները կորցրել են 660 տրիլիոն ռիալ առձեռն գումար:

Երեքշաբթի դոլարը նույնպես տատանվել է՝ օրվա առաջին կեսին կազմելով 36 500 ռիալ, ապա իջել 32 600 ռիալի:
Եվրոյի կուրսը նույնպես անկում է ապրել` 55 800 ռիալից հասնելով 52 100 ռիալի:

«Կան որոշակի պատճառներ, որոնք դրդում են նման տատանումների: Առաջինն այն է, որ թշնամիները պատժամիջոցներ են կիրառում իրանական նավթի վաճառքի նկատմամբ, իսկ այդ պատժամիջոցներն անդրադառնում են նաև բանկային համակարգին»,-հայտարարել է Ահմադինեջադը:

Նախագահի խոսքերով` այդ իրավիճակը երկրի տնտեսության մեջ ձևավորվել է ոչ թե այսօր, այլ 50 տարի առաջ: