Վրաստանն ու Մոլդովան ԵՄ-ին անդամակցության թեկնածուի կարգավիճակի տրամադրման հարցաթերթիկներ կստանան

Վրաստանն ու Մոլդովան երկուշաբթի, ապրիլի 11-ին, կստանան հարցաթերթիկներ, որոնց լրացնելն անհրաժեշտ քայլ է երկրներին ԵՄ-ին անդամակցության թեկնածուի կարգավիճակի տրամադրման համար։ Այս մասին իր Twitter-ում հայտնել է ընդլայնման եւ հարեւանության քաղաքականության հարցերով եվրահանձնակատար Օլիվեր Վարհելին, գրում է «Նովոստի-Գրուզիան»։

«Եվրահանձնաժողովի նախագահ Ուրսուլա ֆոն դեր Լյայենը հարցաշարը երեկ հանձնեց Ուկրաինային, իսկ ես երկուշաբթի օրը կհանձնեմ Վրաստանին եւ Մոլդովային։ Պատասխանները կօգնեն Եվրահանձնաժողովին եզրակացություններ պատրաստել երկրների հայտերի վերաբերյալ»,- գրում է Վարհելին։

Ավելի վաղ Վրաստանի ԱԳՆ-ից հայտնել էին, որ պատրաստ են լրացնել հարցաթերթիկը։ Գործընթացի համակարգումը վստահվել է եվրաինտեգրման կառավարական հանձնաժողովին։

Մարտի 3-ին Վրաստանի վարչապետ Իրակլի Ղարիբաշվիլին ստորագրել էր երկրին ԵՄ անդամակցության թեկնածուի կարգավիճակ շնորհելու հայտը։ Իշխանությունները ծրագրում էին միայն 2024թ․ դա անել, սակայն, ինչպես պարզաբանել են իշխող թիմում, Թբիլիսին որոշել է արագացնել գործընթացը՝ «հաշվի առնելով քաղաքական ենթատեքստը եւ նոր իրականությունը»։

Վրաստանը, հայտն ուղարկել է Ուկրաինայից հետո, որը փետրվարի 28-ին արագացված ընթացակարգով Եվրամիությանն անդամակցելու դիմում էր ներկայացրել։ Թբիլիսիից հետո Մոլդովան էր նման խնդրանքով ԵՄ-ին դիմել։

Վրաստանը, Ուկրաինան եւ Մոլդովան «Արեւելյան գործընկերություն» ծրագրի մասնակիցներ են, որոնք ձգտում են Եվրամիության լիիրավ անդամ դառնալ։ Հետխորհրդային երեք երկրները ԵՄ-ի հետ ասոցացման համաձայնագրեր են ստորագրել, օգտվում են ազատ առեւտրի գոտիներից եւ առանց վիզայի ռեժիմից։ 2021թ․ մայիսին նրանք հայտարարել են «ասոցացված եռյակի» ձեւաչափի ստեղծման մասին, որը ենթադրում է ավելի սերտ համակարգում Թբիլիսիի, Կիեւի եւ Քիշնեւի միջեւ՝ ուղղված ԵՄ-ի հետ ընդլայնված համագործակցությանը։