Աննա Հակոբյանը Վանաձորում այցելել է Ստեփան Զորյանի տուն-թանգարան, Գեղագիտության ազգային կենտրոն և Գուգարաց թեմի առաջնորդարան

ՀՀ վարչապետի տիկին Աննա Հակոբյանի վանաձորյան այցը շարունակվել է Ստեփան Զորյանի տուն-թանգարանում։ 20-րդ դարի հայ խոշոր արձակագիր Ստեփան Զորյանը 1964-1967 թվականներին ապրել է այս տանը: Վարպետի աշխատասենյակն ու ննջասենյակը պահպանվել են նույն կերպ։

Թանգարանի աշխատակիցներն Աննա Հակոբյանին ուղեկցել են երկրորդ հարկ, որտեղ մեծ բեմն է։ Այստեղ ամիսը մի քանի անգամ հանդիպումներ են կազմակերպում մշակույթի գործիչների հետ, անցկացնում են գրքի շնորհանդեսներ: Մի անկյունում էլ Զորյանի դիմանկարն է, որի հեղինակը Մարտիրոս Սարյանն է։ Այցելուները հնարավորություն ունեն հավելվածի միջոցով կենդանացնել պատկերն ու լսել Ստեփան Զորյանի ձայնը։

Աննա Հակոբյանը գրառում է կատարել թանգարանի հուշամատյանում՝ շնորհակալություն հայտնելով թանգարանի աձնակազմին ազգային ժառանգության այս կարևորը կտորը այսքան խնամքով պահպանելու համար։

ՀՀ վարչապետի տիկնոջ մշակութային մյուս կանգառը Գեղագիտության ազգային կենտրոնի Վանաձորի մասնաճյուղն էր: Նկարչության, ապլիկացիայի, ասեղնագործության, բատիկայի, կարպետագործության խմբակներում սովորում են 6-18 տարեկան երեխաներ, որոնց թիվը տարեկան հասնում է 300-ի: Կենտրոնում հիմնականում սովորում են աղջիկ։ Տղաներին ներգրավելու և նրանց քանդակագործություն ու կավագործություն սովորեցնելու համար առայժմ տարածքի խնդիր կա։ Գեղագիտության ազգային կենտրոնի Վանաձորի մասնաճյուղում պահեստային տարածքի կարիք էլ կա, որպեսզի կարողանան պահել երեխաների ստեղծագործությունները։

Կենտրոնի տնօրենն Աննա Հակոբյանին ներկայացրել է վանաձորցի երեխաների ստեղծագործությունները: Կարպետագործության դասարանում Աննա Հակոբյանը հետևել է, թե ինչպես են երեխաները գորգ գործում ինքնաշեն և պրոֆեսիոնալ սարքերի վրա։ Վարչապետի տիկնոջ այցն այստեղ ավարտվել է պատրաստի գորգի կտրման հանդիսավոր արարողությամբ։

Հաջորդ կանգառը Գուգարաց թեմի առաջնորդարանն էր, որտեղ Աննա Հակոբյանին դիմավորել է թեմի առաջնորդ Գերաշնորհ Տեր Հովնան Եպիսկոպոս Հակոբյանը։ Վարչապետի տիկինը մոմ է վառել Սուրբ Սարգիս եկեղեցում և առանձնազրույց ունեցել թեմի առաջնորդի հետ։ Աննա Հակոբյանը ծանոթացել է թեմի սոցիալական ծրագրերին: Այստեղ գործում է «Տուն» սոցիալ կրթական կենտրոնը, որտեղ հիմնականում հաճախում են հակամարտություններից տուժած ընտանիքների երեխաները։ Այս պահին կենտրոնում սովորում է 55 երեխա, որոնք հմտանում են նկարչության և կարպետագործության ոլորտներում: Նրանց ծնողների համար էլ վերամասնագիտացման ծրագրեր կան, կարող են ստանալ նաև հոգեբանական աջակցություն: