Իսրայելն իր քաղաքացիներին կոչ է անում զերծ մնալ Թուրքիա այցելություններից

Իսրայելի արտգործնախարար Յաիր Լապիդը հորդորել է իսրայելցիներին մոտ ապագայում ձեռնպահ մնալ Թուրքիա թռիչքներից։ Այդ մասին նա հայտարարել է հունիսի 13-ին ելույթ ունենալով «Եշ Աթիդ» խորհրդարանական խմբակցության նիստում։

«Թուրքիայում վերջին շաբաթների իրադարձություններից և Ստամբուլ հանգստի մեկնած իսրայելցիների դեմ իրանական մի շարք ահաբեկչություններից հետո, մենք կոչ ենք անում իսրայելցիներին չթռել Ստամբուլ և, եթե կենսական անհրաժեշտություն չունեք, ընդհանրապես չթռչել Թուրքիա։ Եթե ​​արդեն Ստամբուլում եք, վերադարձեք Իսրայել որքան հնարավոր է շուտ: Իսրայելի անվտանգության ծառայությունները, արտաքին գործերի նախարարությունը, վարչապետի գրասենյակը և մենք բոլորս վերջին շաբաթների ընթացքում հսկայական ջանքեր են գործադրել՝ փրկելու իսրայելցիների կյանքը։ Նրանցից ոմանք վերադարձան Իսրայել՝ չիմանալով, որ իրենց կյանքը փրկվել է։ Ահաբեկչական գործողություններ էին նախապատրաստվել արձակուրդ մեկնած իսրայելցիների դեմ, նրանք նպատակաուղղված ընտրում էին Իսրայելի քաղաքացիներին՝ նրանց առևանգելու կամ սպանելու համար», - ասել է Լապիդը։

Նա նաև շնորհակալություն է հայտնել թուրքական կառավարությանը Իսրայելի քաղաքացիների կյանքը պաշտպանելու նպատակով գործադրվող ջանքերի համար. «Թուրքիայում զբոսաշրջությունը կարևոր է երկու երկրների համար, բայց նրանք նաև հասկանում են, որ կան ռիսկեր, որոնց չի կարելի դիմել»: