Տղամարդը վերանորոգման ժամանակ հին նամակ է գտել ու քննարկումների տեղիք տվել

Reddit-ի օգտատերը ցույց է տվել հին նամակ, որը գտել է իր տունը վերանորոգելիս։ Տղամարդու հրապարակումը պորտալում բուռն քննարկումներ է առաջացրել. մեկ օրից էլ քիչ ժամանակում դրա տակ երեք հազարից ավելի մեկնաբանություն է հայտնվել։

Գրառման հեղինակն ասել է, որ գրասեղանի գզրոցներից մեկում գտել է ուրիշի նամակը։ Նշվում է, որ նամակը գրվել է 1987 թվականի ապրիլի 14-ին։

«Քրիստի, շատ շնորհակալ եմ, ինչ իսկական ընկեր ես, իսկ ես քեզ վստահում էի։ Ես երբեք չեմ դիպել քեզ պատկանող որևէ բանի: Ահա քո անիծյալ շորտերը, որ ինձ համար գնել էիր։ Ինձ պետք չեն դրանք։ Միայն ուզում եմ, որ ինձ վերադարձնես 50 դոլարը, որը տվել էի Ֆլորիդա գնալու համար, որովհետև պետք է այն վերադարձնեմ` ​​քո և Դիանայի շնորհիվ: Այլևս երբեք չեմ վստահի քեզ, երբեք»,- ասված է նամակի տեքստում։

Օգտատերերից մեկն առաջարկել է, որ եթե նամակի հեղինակն այսօր այն տեսնի համացանցում, ամոթ կզգա։ «Այս գրառման մեջ կարող եք զգալ դեռահասի ողջ զայրույթը», - կարծիք է հայտնել մեկ այլ մեկնաբան:

Մեկ այլ օգտատեր նամակը կարդալուց հետո կարոտ է զգացել։ «Աստված իմ, կարոտում եմ 1980-ականները, երբ այսպիսի նամակներ էինք գրում: Միշտ լինում էր ինչ-որ դրամա, որում խառնված էին Քրիստին կամ Հիզերը»,- հիշել է նա: