Ռուսաստանի պատճառով՝ աշխարհում սննդամթերքի աղետալի թանկացումներ են․ Զելենսկի

«Ռուսական ներխուժումն Ուկրաինա ազդել է աֆրիկյան երկրների վրա՝ հացահատիկի արտահանման արգելափակման պատճառով՝ պարենային ապրանքների գների աճով»: Այս մասին հայտարարել է Ուկրաինայի նախագահ Վոլոդիմիր Զելենսկին Աֆրիկյան միության ասամբլեայի բյուրոյի նիստում։

«Սննդամթերքի աղետալի գների աճն արդեն պատերազմը միլիոնավոր աֆրիկացի ընտանիքների տուն է մտցրել այնպես, ինչպես Ասիայի, Եվրոպայի, Լատինական Ամերիկայի շատ ընտանիքներ։ Բոլոր մայրցամաքներում ցավալիորեն զգացվում է սննդամթերքի գների անարդար մակարդակը, որը հրահրվել է ռուսական պատերազմի պատճառով։ Բայց ձեր երկրների համար էլ, ցավոք, դա կարող է առանձնահատուկ խնդիր դառնալ»,- ասել է Զելենսկին։

Նա նշել է, որ մինչ «Ռուսաստանի Դաշնության՝ Ուկրաինա ներխուժումն» աշխարհում տեղի էին ունենում արտասովոր գնաճային գործընթացներ։ «Տարբեր պետություններ արդեն ուղարկել են հսկայական ֆինանսական ռեսուրսներ՝ աջակցելու տնտեսությանը COVID-19-ի պատճառով ճգնաժամի պայմաններում։ Սակայն սննդի պակասի հետ կապված՝ նման բան չկար։ Ճգնաժամը սկսվեց հենց փետրվարի 24-ին, երբ ռուսական նավատորմը արգելափակեց ուկրաինական նավահանգիստները Սև և Ազով ծովերի վրա։ Եվ եթե չլիներ Ուկրաինայի դեմ ռուսական պատերազմը, պարենային ապրանքների շուկայում պարզապես դեֆիցիտ չէր լինի։ Եթե ​​չլիներ ռուսական պատերազմը, մեր ֆերմերներն ու գյուղատնտեսական ընկերությունները այս տարի կկարողանային ռեկորդային բերք ապահովել։ Եթե ​​չլիներ ռուսական պատերազմը, ապա Աֆրիկայում, Ասիայում և աշխարհի ցանկացած կետում մարդիկ չէին տուժի սննդամթերքի աղետալի թանկացումներից։ Պարզապես նման աղետալի թանկացում չէր լինի»,- ընդգծել է Զելենսկին։