Ռուսաստանում վարորդների ավելի քան մեկ երրորդը խոսում է իր մեքենայի հետ

Այլ 26 Հունիս, 2022 1:27

Ռուսաստանում վարորդների ավելի քան մեկ երրորդը խոսում է իր մեքենայի հետ

Ռուսաստանցի վարորդները պատմել են իրենց արտասովոր սովորությունների մասին՝ մեքենայի հետ խոսել, սիրելի վայրում կայանել և այլն, ասվում է «СберАвто»-ի հետազոտության մեջ, որը ներկայացնում է ՌԻԱ Նովոստին։

«Եթե խոսենք ռուսաստանցի վարորդների սովորությունների մասին, ապա դրանցից մեկն այն է, որ, օրինակ, առևտրի կենտրոններ այցելելուց հետո հարցվածների 50%-ը սայլակները հեռացնում է կայանատեղից, որպեսզի չքերծեն այլ մեքենաները, 42%-ը փորձում է կայանել իր սիրելի վայրում, իսկ հարցվածների ավելի քան մեկ երրորդը (36%) խոստովանել է, որ խոսում է իր մեքենայի հետ»,- ասվում է հետազոտության մեջ, որին մասնակցել են 1500 մեքենաների սեփականատերեր ամբողջ Ռուսաստանից։

Հետազոտության մասնակիցների 11%-ը սովորություն ունի նկարել մեքենայի վազքը ցույց տվող սենսորի վրա, ևս 11%-ը հիշում է մոտակայքում գտնվող մեքենաների համարները. դա կարող է պետք գալ, եթե ինչ-որ մեկը քերծի մեքենան։ «Եւս 10%-ը ճանապարհին սուրճ է գնում սիրելի սրճարաններից մեկում, իսկ հարցվածների 3%-ը հարվածում է դիմածածկոցին (կապոտ) նախքան մեքենա վարելը, որպեսզի համոզվեն, որ կատու կամ որևէ այլ կենդանի չի թաքնվել դրա տակ»,- ասվում է հետազոտությունում։

Օգտակար սովորությունների շարքում առավել տարածված է կոմպակտ կայանումը՝ դրան հավատարիմ է հարցվածների 77%-ը։ Եվս 63%-ը ճանապարհը զիջում է նրանց, որոնք այդ մասին խնդրում են, իսկ 50%-ը զիջում է անվստահ վարորդներին։

Ամենավնասակար սովորության վարկանիշը գլխավորել է մեկ ձեռքով մեքենա վարելը. դա անում է հարցվածների գրեթե կեսը (49%)։ 25%-ն իրեն թույլ է տալիս վիրավորական արտահայտություններ անել այլ վարորդների կամ հետիոտների հասցեին, իսկ 23%-ը մեքենա վարելիս օգտագործում է գաջեթներ:

«Մեքենա ունեցողների ևս 22%-ը շատ հազվադեպ է լվանում իր մեքենան, քանի որ դրա մեջ իմաստ չի տեսնում, 16%-ը բարձր երաժշտություն է լսում, իսկ 2%-ը աղբը նետում է մեքենայի պատուհանից: Եղել են նաև այնպիսիք, որոնք խոստովանել են, որ ճանապարհի բաց հատվածներում զգալիորեն գերազանցում են թույլատրելի արագությունը և չեն կապում ամրագոտիները»,- նշված է վերլուծությունում։