Բորիս Ջոնսոնը ռուսաստանցի գիտնականներին հորդորել է տեղափոխվել Բրիտանիա

Մեծ յոթնյակի գագաթնաժողովի շրջանակում վարչապետ Բորիս Ջոնսոնը ռուս գիտնականներին, ովքեր դժգոհ են իրենց երկրի քաղաքականությունից, հրավիրել է աշխատելու Մեծ Բրիտանիայում։

Նրա խոսքով՝ այս առաջարկը Ուկրաինայի և Մեծ Բրիտանիայի ԲՈՒՀ֊երի միջև գործընկերության համակարգի ընդլայնման մի մասն է, որը թույլ է տալիս ուկրաինացի գիտնականներին զբաղվել բրիտանական հաստատություններում հետազոտություններով:

«Ռուս ակադեմիկոսներն և հետազոտողները, ովքեր սարսափով են դիտարկում Պուտինի բռնությունը և ովքեր այլևս իրենց անվտանգ չեն զգում  Ռուսաստանում, թող դիմեն Մեծ Բրիտանիա տեղափոխվելու և աշխատելու մի երկրում, որը գնահատում է ազատությունը և գիտելիքի ձգտումը»,- նրա խոսքերը մեջբերում է The Guardian֊ը։

Հոդվածում նշվում է, որ Մեծ Բրիտանիան 10 միլիոն ֆունտ է հատկացրել «Ռիսկի խմբում գտնվող հետազոտողներ» ծրագրին, որի շրջանակներում 130 ուկրաինացի գիտնականներ կտարվեն Մեծ Բրիտանիա և աջակցություն կստանան։

Ավելի վաղ Bloomberg-ը հայտնել էր, որ ԱՄՆ նախագահ Ջո Բայդենի վարչակազմը որոշել է «զրկել» Ռուսաստանի նախագահ Վլադիմիր Պուտինին «իր լավագույն նորարարներից»՝ դյուրացնելով վիզային պահանջները այն առաջատար գիտնականների համար, ովքեր ցանկանում են գնալ ԱՄՆ։