«Այս մահերը Բայդենի բաց սահմանների քաղաքականության արդյունքն է»․ Տեխասում բեռնատարում մահացած միգրանտների թիվը հասել է 51-ի

Աշխարհ 29 Հունիս, 2022 12:23

ԱՄՆ Տեխաս նահանգում բեռնատարի մեջ շնչահեղձությունից մահացած միգրանտների թիվը հասել է 51-ի, 13 հոգի ծանր վիճակում գտնվում է հիվանդանոցներում։ Այս մասին հայտարարել է Տեխասում Մեքսիկայի հյուպատոս Ռուբեն Մինուտտին Milenio TV հեռուստաալիքով հեռարձակվող մամուլի ասուլիսում։

«Ընդհանուր առմամբ՝ տարբեր բժշկական հաստատություններում հոսպիտալացվել է 13 մարդ։ Վիրավորների վիճակը ծանր է՝ նյարդաբանական, երիկամային, լյարդի անբավարարությամբ և ներքին արյունահոսությամբ։ Զոհերի թիվը այս պահին 51 է»,– մանրամասնել է Մինուտտին։

Հիշեցնենք, որ, ինչպես ավելի վաղ հայտնել էինք, Տեխասում դեպի մայրուղի տանող փոքրիկ ճանապարհի վրա մարդկանցով լի բեռնատար է հայտնաբերվել։ Սան Անտոնիոյի հրշեջ ծառայության տվյալներով՝ բեռնատարի հետնամասում ջուր կամ օդորակիչ չի եղել։

Ողբերգության զոհերի թվում առնվազն 27 մեքսիկացի կա։

Մեքսիկայի նախագահ Անդրես Մանուել Լոպես Օբրադորն ասել է, որ Կենտրոնական Ամերիկայում և Մեքսիկայում աղքատության և հուսահատության այս ցավալի իրադարձությունները պայմանավորված են մարդկանց թրաֆիքինգի և ԱՄՆ-ի հետ երկրի սահմանին ու ԱՄՆ-ի ներսում վերահսկողության բացակայությամբ:

Ավելի վաղ ԱՄՆ Տեխաս նահանգի նահանգապետ Գրեգ Էբոթը այս ողբերգության մեջ մեղադրել էր ԱՄՆ նախագահ Ջո Բայդենին և նրա վարչակազմի միգրացիոն քաղաքականությանը։

«Տեխասում ներգաղթյալների բեռնատարում առնվազն 42 մահացած մարդ է հայտնաբերվել: Այս մահերը Բայդենի խղճի վրա են: Սա նրա մահացու բաց սահմանների քաղաքականության արդյունքն է»,- գրել է նահանգապետը Twitter-ի իր էջում: