Ջեֆրի Էփշտեյնի ընկերուհին դատապարտվել է 20 տարվա ազատազրկման անչափահասների սեքս֊թրաֆիքինգի համար (լուսանկարներ)

Դատարանը տխրահռչակ մանկապիղծ միլիարդատեր Ջեֆրի Էփշտեյնի ընկերուհուն՝ 60-ամյա Գիսլայն Մաքսվելին, դատապարտել է 20 տարվա ազատազրկման և 750 հազար դոլար տուգանքի՝ անչափահասների սեքս֊թրաֆիքինգի համար:

Մաքսվելը կալանքի տակ է 2020 թվականի հուլիսից։ Անցյալ տարեվերջին երդվյալ ատենակալները նրան մեղավոր ճանաչեցին վեց հոդվածներից հինգում (ամենալուրջը անչափահասների թրաֆիքինգն էր՝ սեռական շահագործման նպատակով): Ապացուցվեց, որ 1994-2004 թվականներին մի կին հավաքագրել է դեռահաս աղջիկների՝ իր ընկերոջ՝ Էփշտեյնի համար, ում գործարարը համոզել է զբաղվել սեռական գործունեությամբ։ Դատախազությունը պնդել է, որ Գիսլայնին դատապարտեն 30-55 տարվա ազատազրկման։ Նրա փաստաբանները խնդրել են իրենց պաշտպանյալի համար 5 տարուց ոչ ավելի պատիժ սահմանել։

Ինչպես պարզել է մամուլը, գործարարը մի քանի տարի շարունակ օրգիաներ է կազմակերպել իր ընկերների համար՝ անչափահասների մասնակցությամբ Կարիբյան ավազանի սեփական կղզում։ 2019 թվականի ամռանը Ջեֆրի Էփշտեյնը ձերբակալվեց, բայց գործը այդպես էլ չհասավ դատարան։ Մեկ ամիս անց ֆինանսիստին մահացած հայտնաբերեցին իր խցում։ Նրա մահը որակվեց՝ որպես ինքնասպանություն։ 2022 թվականի փետրվարին մոդելային գործակալ Ժան-Լյուկ Բրյունելը, ով Էպշտեյնի գործով մեղադրյալներից մեկն էր, նույնպես մահացավ բանտում։ Նրա մահը նույնպես որպես ինքնասպանություն որակվեց։

Էփշտեյնի ընկերները շատ հարուստ ու հայտնի մարդիկ էին, այդ թվում՝ Եղիսաբեթ II թագուհու որդին՝ արքայազն Էնդրյուն։ Էփշտեյնի զոհերից մեկը՝ Վիրջինիա Ջիֆրեն, մեղադրել է արքայազն Էնդրյուին բռնաբարության մեջ, սակայն գործը փակվեց դատարանից դուրս՝ արքայազնը հսկայական փոխհատուցում վճարեց: Սկանդալի պատճառով նրան զրկեցին բոլոր պաշտոնական կոչումներից և դադարեցրին թագավորական ընտանիքի անդամի նրա պարտականությունները։