ԱՄՆ-ն պետք է դադարեցնի օգնություն ուղարկել Ադրբեջանին և Թուրքիային, որոնց նպատակը հայերի էթնիկ զտումն է․ Գլենդելի քաղաքապետ

Ադրբեջանի վերջին հարձակումը Հայաստանի ինքնիշխիան տարածքի վրա հարուցեց համայն հայության վրդովմունքը․ բողոքի ցույցեր եղան ինչպես Հայաստանում, Արցախում, այնպես էլ՝ Լիբանանում, Փարիզում, ԱՄՆ-ում և այլուր։ Հարցին, թե ինչպիսի՞ն է հայաշատ Գլենդել քաղաքում ամերիկահայության արձագանքը թշնամու հերթական ռազմական սադրանքին, ԼՈՒՐԵՐ․com-ի հետ զրույցում Գլենդելի քաղաքապետ Արտաշես Արդի Քասախյանը նշեց հետևյալը․

«Այստեղ՝ Գլենդել քաղաքում, մեր բնակիչները խիստ վրդովված են Ադրբեջանի վերջին հարձակումներից։ Յուրաքանչյուր հայ, ում հետ խոսում եմ, խոսում է Հայաստան ներխուժումների մասին։ 2020 թվականի պատերազմի ժամանակ տեղի ունեցածի պատճառով անվստահություն կա նաև իշխանությունների կողմից տրամադրվող տեղեկատվության նկատմամբ։ Սա միայն ավելացնում է հիասթափությունը: Եղել են հանպատրաստից հավաքներ և բողոքի ցույցեր, բայց ոչ այն մասշտաբով, ինչպես նախկինում 2020 թվականին: Ես դա պայմանավորում եմ այն ​​ցնցումով և սգով, որը դեռ շատերը զգում են»։ 

Ադրբեջանի վերջին հարձակումներից հետո բավականին ակտիվացել է Վաշինգտոնը․ ագրեսիան դատապարտելուց զատ, Հայաստան է ժամանելու Կոնգրեսի Ներկայացուցիչների պալատի խոսնակ Նենսի Փելոսին։ Այս համատեքստում ի՞նչ կարող ենք ակնկալել ԱՄՆ-ից։

«Վստահ չեմ, թե ԱՄՆ-ն ինչ քայլեր է պատրաստվում ձեռնարկել պաշտոնապես, բայց ես կողմնակից եմ կոնգրեսական Ադամ Շիֆի օրինագծին՝ անհապաղ դադարեցնել բոլոր օգնությունները Ադրբեջանին: Շատ պարզ է, որ ազատության աջակցության ակտի 907-րդ կետից հրաժարվելը, որը թույլ էր տալիս ԱՄՆ նախագահներին նման աջակցություն ուղարկել Ադրբեջան, աղետալի ազդեցություն է ունեցել տարածաշրջանի աշխարհաքաղաքական իրավիճակի վրա: Ադրբեջանը բազմիցս ապացուցել է, որ վստահելի կամ ազնիվ գործընկեր չէ խաղաղ գործընթացում, փոխարենը ցանկանում է էթնիկական զտում իրականացնել տարածաշրջանը հայերից մաքրելու համար։ Սա ակնհայտ է և այդ մասին են վկայում այդ երկրի տարբեր պաշտոնյաների քաղաքական ելույթները»:

Արդի Քասախյանը հույս հայտնեց, որ Նենսի Փելոսիի տարածաշրջան կատարած այցից ինչ-որ դրական բան կլինի։

«Բայց ես վստահ չեմ, թե որն է նրանց մտադրությունը, եթե նրանք արագ չգործեն՝ դադարեցնելու օգնությունը Ադրբեջանին և Թուրքիային, որն ակնհայտորեն օգտագործում է ամերիկյան ռազմական տեխնիկան։ Վաշինգտոնը պետք է վերջ տա Ալիևի վարչակազմի ջանքերին օգնելուն։ Որպես ամերիկացի՝ ես խորապես հիասթափված եմ, բայց հուսով եմ, որ մեր ղեկավարները ճիշտ կվարվեն և կդադարեցնեն այս հարձակումներն ու ներխուժումը Հայաստան»,-ընդգծեց Գլենդելի քաղաքապետը։

Արա Ալոյան