ՀՀ-ն միջազգային սկանդալների կիզակետում. ովքե՞ր են հարվածում երկրի վարկանիշին

Վերլուծական 20 Սեպտեմբեր, 2022 20:30

ՀՀ-ն միջազգային սկանդալների կիզակետում. ովքե՞ր են հարվածում երկրի վարկանիշին

2018 թվականին՝ Թավշյա հեղափոխության օրերին օրերին, Նիկոլ Փաշինյանը ամբիոնից վստահեցնում էր հանրությանը, որ իր թիմը անելու է ամեն ինչ, որպեսզի բարձրացնի ՀՀ միջազգային վարկանիշը, որը զգալիորեն տուժել էր ըստ նրա՝ վերջին 30 տարիներին իշխանությունների վարած քաղաքականության արդյունքում: Բարձրացրեցին արդյո՞ք ՔՊ-ականները ՀՀ միջազգային վարկը, թե եղավ այն, ինչ եղավ՝ դատեք ինքներդ:

Հայաստանի հպարտ քաղաքացիների հիշողության մեջ դեռ վառ է, որ նախորդ տարի Աբու Դաբիում ընթացող IDEX-2021 միջազգային ռազմարդյունաբերական ցուցահանդեսին Հայաստանը մասնակցում էր դատարկ տաղավարներով՝ միայն բուկլետ բաժանելով։ Նման «շքեղ» պրեզենտացիայի պատասխանատում Բարձր Տեխնոլոգիական արդյունաբերության նախարարությունն էր` ի դեմս այն ժամանակվա նախարար Հակոբ Արշակյանի։ Նախարարը հայկական տաղավարի աչք ծակող դատարկությունը բացատրեց լոգիստիկ խնդիրներով. հաշվարկներն այնպես էին արել, որ ցուցահանդեսի բացմանը տեսականին տեղում լիներ, սակայն, արի ու տես, պարզվեց անգամ հաշվարկ անելը նախարարի համար չափից դուրս բարդ առաջադրանք էր։

Այս դեպքից հետո ամիսներ անց էկոնոմիկայի նախարար նշանակված Վահան Քերոբյանը սրտնեղել էր, որ Հակոբ Արշակյանին չի հաջողվել ավելին քամել վերը նշված ցուցահանդեսից և մեր տնտեսությունը առանձնապես ոչինչ չի շահել։ Քերոբյանին այս տարի շանս ընձեռվեց ուղղել Արշակյանի շահերը` Դուբայ 2020 էքսպոյում ՀՀ պատվիրակության ղեկավարը հենց էկոնոմիկայի նախարարն էր։ Հաշվի առնելով Վահան Քերոբյանի կատակասիրությունը` կարելի է հասկանալ, թե ինչու են այս տարի հայկական ազգային արժեքները ներկայացնող ստենդում տեղ գտել «американские горки»-ն։ Ըստ ՔՊ-ական պաշտոնյայի` մենք ազգովի պետք է հպարտանանք հենց դրանով։

Մամուլը գրել էր, որ ապրիլի 25-ին ՀՀ ԱԺ իշխանական խմբակցության մի խումբ պատգամավորներ գործուղվել են Ժնև, սակայն ժամանակին տեղ չեն հասել: Աղբյուրները պատմում են, որ ՔՊ խմբակցության մի քանի անդամներ Վիեննայի օդանավակայանում սրճարան են նստել, գինովցել են ու մոռացել, որ պետք է Ժնև մեկնեն: Նրանք երկար դեգերումներից հետո մի կերպ կարողացել են Ժնև մեկնող հաջորդ օդանավին հասնել և ուշացած միացել են պատվիրակությանը: Պատգամավորների անունները նույնպես շրջանառվում էին՝ Արփի Դավոյան, Վահագն Հովակիմյան, Վահագն Ալեքսանյան, Արթուր Հովհաննիսյան: Վերջիններս կամ հրաժարվել են պատասխանել՝ համապատասխանում է այդ լուրը իրականությանը, թե ոչ, կամ ասել են, որ անլուրջ հարցերի չեն պատասխանում: Թե որքանով է սա հերքում՝ դատեք ինքներդ:

Հայաստանը ներքաշվում է միջազգային սկանդալի մեջ, որովհետև ավիացիոն կոմիտեի արդեն նախկին նախագահ Տաթևիկ Ռևազյանը չի կարողանում հոդաբաշխ բացատրել, թե ինչպես է ամերիկյան Բոինգը հայտնվել Իրանում:

Հայաստանի և Վրաստանի միջև միջպետական սկանդալ տեղի ունեցավ՝ կապված Հայաստանի առողջապահության արդեն նախկին նախարար Արսեն Թորոսյանի կողմից արված հայտարարության հետ, որում նախարարը կորոնավիրուսի դեմ պայքարի հայաստանյան փորձը առավել հաջողված էր համարել և ակնարկել, որ վրացական կողմն ունի տվյալների ներկայացման հարցում թափանցիկության խնդիր: Թորոսյանի վրացի գործընկերներն անչափ կտրուկ էին արձագանքել նրա հայտարարությանը, բանը հասել էր նրան, որ Թորոսյանը ստիպված էր եղել դիվանագիտական խողովակներով ներողություն խնդրել վրացական կողմից:

Սփյուռքի գործերով գլխավոր հանձնակատար Զարեհ Սինանյանի պատմության իմացությունը քիչ էր մնում միջազգային սկանդալի հանգեցներ, քանի որ վերջինս ոչ ավել ոչ պակաս ճապոնացիներին անվանել էր չինացիների և կորեացիների սինթեզ:

Հայաստան-Իրան հարաբերությունների վրա զգալի ստվեր էր գցել՝ ՔՊ-ական պատգամավոր Հայկ Կոնջորյանի ԱԺ ամբիոնից արված հայտարարությունն առ այն, որ Իրանը հանդիսանում է տոտալիտար պետություն: Դրանից հետո պաշտոնական խողովակներով հարցը թերևս հաջողվել է կարգավորել, սակայն, հետքը, ինչպես ասում են, մնացել է:

Բոլորիս հիշողության մեջ թարմ է Ռուբեն Ռուբինյանի հակառուսական քվեարկությունը ԵԽԽՎ-ում, որից հետո պաշտոնյան հայտարարեց, որ պարզապես սխալվել է, և դրանից հետո էլ ստիպված էր ռուսական կողմի հետ մերձեցման երեկոներ կազմակերպել՝ իրավիճակը շտկելու նպատակով:

Լրջագույն սկանդալի առիթ էր հանդիսացել վարչապետ Փաշինյանի՝ պատերազմից հետո արված հայտարարությունը՝ Իսկանդերների` 10 տոկոսով կրակելու մասին, որով Փաշինյանը, ըստ էության, կասկածի տակ դրեց ռուսական ռազմաարդյունաբերության արդյունավետության հարցը:

Ընդամենը օրեր առաջ էլ հերթական սկանդալը գրանցվեց Նենսի Փելոսիի այցի ընթացքում: ԱԺ աշխատակազմի ղեկավարը, ով պետք է ներքևում պատշաճ կերպով կազմակերպեր ասուլիսը և դրա ընթացքը, Միացյալ Նահանգների Ներկայացուցիչների պալատի խոսնակ Նենսի Փելոսիի կողքն էր բազմել, ընդ որում այնքան էր ջանում հայտնվել առաջին պլանում, որ ստվերել էր անգամ ԱՄՆ դեսպան Թրեյսին:

Արդյո՞ք իրականություն դարձավ Փաշինյանի՝ 2018-ին արված հայտարարությունը, արդյո՞ք բարձրացավ ՀՀ միջազգային վարկանիշն իր թիմակիցների գործողությունների արդյունքում, թերևս՝ հակառակը...