Նոր կահույք, «եվրոռեմոնտ», ցախավելներ. ինչպե՞ս են ՔՊ-ականները «պատրաստվում» պատերազմին

Պատերազմի ավարտից օրեր անց թվում էր, թե պետական գերատեսչությունները կլծվեն Ադրբեջանի նոր հնարավոր ագրեսիային դիմակայելուն նախապատրաստվելուն, հատկապես, որ գրեթե բոլոր ներքին և միջազգային ամբիոններից Փաշինյանն ու թիմակիցները հայտարարում են, որ նոր պատերազմի ռիսկը մեծ է և Ադրբեջանը էլ ավելի մեծ մասշտաբի հարձակում է նախապատրաստում:

Այս ամենը քաջ գիտակցելով` մեր պետական այրերը սակայն նախընտրել են չհետևել ադրբեջանցիների օրինակին և զբաղվել` կա՛մ սեփական կոմֆորտը բարելավելով, կա՛մ այնպիսի խնդիրների լուծմամբ, որոնք պարզից էլ պարզ է՝ տեղին չեն և ունեն տասներորդական նշանակություն:

Դիցուք՝  գործադիրը երեկվա նիստում որոշեց ՀՀ էկոնոմիկայի նախարարության աշխատակիցներին բարվոք աշխատանքային պայմաններով ապահովելու համար պետբյուջեից 31 մլն 660 հազար դրամ հատկացնել՝ զուգարանները վերանորոգելու համար։

Երևանի քաղաքապետարանը 24 միլիոն դրամով, որը համարժեք է մոտ 56 հազար ԱՄՆ դոլարին, 60 հազար հատ ցախավել է ձեռք բերել։ Գնումը կատարվել է էլեկտրոնային աճուրդի ընթացակարգով՝ «Լիանա Մարգարյան Ռուբենի» Ա/Ձ–ից։ Ցախավելներ ձեռք բերելու անհրաժեշտություն է տեսել «Երևանի աղբահանության և սանիտարական մաքրում» համայնքային հիմնարկը։

13 մլն դոլար է հատկացրել Տեղ-Կոռնիձոր ավտոճանապարհի վերակառուցման համար: Մի ճանապարհի, որը, ըստ էության, կարող է և չկառուցվել` հաշվի առնելով, որ սահմանային լարվածությունը պահպանվում է: Կամ էլ կառավարությունը որոշել է այս անգամ ևս թշնամուն բարեկարգ ճանապարհների վրա դիմավորել, հետագայում այդ ճանապարհը վերջիններիս փոխանցելու նպատակով: Իրականում Տեղ-Կոռնիձոր ճանապարհը պետք է որ վաղուց վերակառուցվեր` հաշվի առնելով ռազմավարական նշանակությունը, սակայն իշխանությունները որոշել են դա անել հիմա, երբ, թերևս, ամենաանբարենպաստ պայմաններն են ծրագիրը իրականացնելու համար:

Կոտայքի մարզպետարանը պատերազմից հետո՝ սեպտեմբերի 17-ին 11164500 դրամի բնակարանի առուվաճառք է կատարել: Թերևս Կոտայքի մարզպետ Ահարոն Սահակյանը վստահ է, որ պատերազմն իր մարզի դուռը չի թակելու:

Շրջակա միջավայրի նախարարության անտառային կոմիտեն 300000 դրամի ղեկավարի աթոռ է ձեռք բերել, նախկինը թերևս շատ անհարմար էր, և  Վլադիմիր Կիրակոսյանը ի վիճակի չէր այդ աթոռի վրա կատարել իր վրա դրված աշխատանքային պարտավորությունները՝ հավուր պատշաճի:

ՊԵԿ-ը, որը ղեկավարում է Ռուստամ Բադասյանը, սեպտեմբերի 19-ին 2500000 դրամով ձեռք է բերել Մաքսային ծառայողի համազգեստի մոդելների նախագծման ծառայություններ. ինչ խոսք, տեղին և ինչն էլ ավելի կարևոր է՝ նպատակային ծախս:

Մրցակցության պաշտպանության հանձնաժողովը` ի դեմս Գեղամ Գևորգյանի, նույնպես ժամանակը զուր չի վատնել: Սեպտեմբերի 20-ին այս կառույցը 300000 դրամով գնել է դռների, պատուհանների և հարակից բաղադրիչների տեղադրման աշխատանքներ:

Ինչպես տեսնում ենք` ի տարբերություն թշնամու` մեր պետական հեղափոխական այրերը նոր և ավելի լայնածավալ պատերազմի պատրաստվելու բավական կրեատիվ տարբերակ են գտել. նրանք պետքարան են բարեկարգում, դուռ պատուհան, աթոռ են փոխարինում, ինչ խոսք, այդ ամենը էականորեն կնպաստի ադրբեջանական նոր ագրեսիային պատվով դիմակայելուն...