«Ճամբարափոխ» եղած նախկինները վերարտադրվում են ՔՊ-ի դեմքով

Վայոց Ձորի մարզի Եղեգիս համայնքում ՔՊ հաղթած թեկնածուն նախկին համայնքապետ, ՀՀԿ-ական Արթուր Ստեփանյանն է, ում մասին մամուլը հեղեղված է աղմկոտ նյութերով։ Համագյուղացիները 2018-ին նրա դեմ բողոքի ակցիա էին անում՝ առանց թույլտվության ՀԷԿ կառուցելու համար, եւ գյուղը ողողվել էր «Արթուր՝ հեռացիր» գրառումներով։

 

Թալինում ընտրվեց ՀԱԿ անդամ Տավրոս Սափեյանը։ Պակաս հայտնի դեմք չէ նաև նրա հորեղբայրը՝ Մկրտիչ Սափեյանը: Ավագ Սափեյանին 2019 թվականի նոյեմբերին մեղադրանք էր առաջադրվել խմբի կազմում դիտավորությամբ կոպիտ կերպով հասարակական կարգը խախտելու համար, որի ընթացքում կյանքի և առողջության համար ոչ վտանգավոր բռնություն է գործադրվել Սուրեն Թորոսյանի, Համլետ Պողոսյանի և Հայկ Սահարյանի նկատմամբ: Ավելի ուշ դատարանը Մկրտիչ Սափեյանին մեղավոր էր ճանաչել ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցավոր արարքի կատարման մեջ և նրա նկատմամբ նշանակել տուգանքի ձևով պատիժ՝ նվազագույն աշխատավարձի երկու հարյուր հիսունապատիկի՝ 250.000 ՀՀ դրամ գումարի չափով: Մկրտիչ Սափեյանն իրավապահ մարմինների ուշադրության կենտրոնում հայտնվել էր նաև դրանից առաջ: Տարիներ առաջ նրան դատարանը մեղավոր էր ճանաչել Թալին քաղաքի հրապարակում ազգաբնակչության հետ ՀՀ Նախագահի թեկնածու Լևոն Տեր-Պետրոսյանի հանդիպման ժամանակ մի քաղաքացու հայհոյելու, ապա բռունցնքներով հարվածելու համար:

 

Սիսիանում ՔՊ-ին հաղթանակ պարգևեց Արմեն Հակոբջանյանը, ով նույնպես ՔՊ-ական չէ։ Նա Սիսիանի նախկին քաղաքապետ, ԲՀԿ-ական Աղասի Հակոբջանյանի եղբորորդին է: Ասել է թե՝ Նիկոլ Փաշինյանը նախկինում քրեական գործերի մեջ թաթախված Սիսիանի նախկին քաղաքապետ Աղասի Հակոբջանյանի եղբորորդուն է նշանակում համայնքի ղեկավարի ժամանակավոր պաշտոնակատար: Իսկ ի՞նչ էր արել նախկին քաղաքապետը: 2012թ. Սյունիքի մարզպետարանը Սիսիանի քաղաքապետարանում իրականացրած վարչական հսկողության արդյունքում բացահայտել էր մի շարք խախտումներ: Դրանց հիմքով՝ ՀՀ քրեական օրենսգրքի 308 հոդվածի 1-ին մասով (պաշտոնեական լիազորությունների չարաշահում)՝ քրեական գործ էր հարուցվել այն ժամանակվա համայնքի ղեկավարի տեղակալ Աշոտ Գրիգորյանի նկատմամբ, եւ վերջինս ազատազրկվել էր երեք տարի ժամկետով: Նրա նկատմամբ կիրառվել է Հայաստանի Հանրապետության անկախության հռչակման 20-րդ տարեդարձի կապակցությամբ հայտարարված համաներումը, եւ համայնքի ղեկավարի նախկին տեղակալն ազատվել է պատիժը կրելուց: Անփոփոխ է մնացել, որպես հանցագործությամբ պատճառված գույքային վնասի փոխհատուցում, Աշոտ Գրիգորյանից հօգուտ տուժողի 11 մլն 250 հազար դրամ բռնագանձման մասին դատարանի որոշումը:Սույն գործում որպես մեղադրյալներ ներգրավված են նաեւ Սիսիանի քաղաքապետ Աղասի Հակոբջանյանը, քաղաքապետարանի աշխատակազմի ֆինանսատնտեսական բաժնի պետ Կարեն Դանիելյանը եւ համայնքի ղեկավարի նախկին տեղակալ Աշոտ Գրիգորյանը:

 

Արագածոտնի Ծաղկահովիտ համայնքում ՔՊ ցուցակի առաջին համարը Նորայր Հակոբյանն է, որն արդեն 20 տարի զբաղեցնում է Ծաղկահովիտի համայնքապետի պաշտոնը։ 2012-ի համայնքի ղեկավարի ընտրությունում նա եղել է ՀՀԿ անդամ, իսկ 2017-ին՝ անկուսակցական։

 

Արենիում ՔՊ-ի առաջին համարը գործող համայնքապետ Հուսիկ Սահակյանն է, որն այդ պաշտոնում ընտրվել է 2017-ին՝ որպես ՀՀԿ-ական։ Ավելի վաղ՝ 1996-2005 և 2007-2017 թթ. նա եղել է Ռինդի համայնքապետ։ Ռինդն այժմ Արենի խոշորացված համայնքի մաս է կազմում։

 

Գյուլագարակում ՔՊ հաղթած թեկնածու, ներկայիս համայնքապետ Խաչիկ Վարդանյանը այդ պաշտոնում նշանականվել է 2021-ի հուլիսին, այն բանից հետո, երբ 2017-ին համայանքապետ ընտրված Մհեր Գևորգյանը վաղաժամկետ դադարացրել էր լիազորությունները։ Վարդանյանը 2017-ի ընտրություններին մասնակցել է որպես ՀՀԿ-ական։ Իսկ 2016-ին նա Գյուլագարակի համայնքապետ էր ընտրվել որպես «Հայկական վերածնունդ» («Օրինաց երկիր») կուսակցության անդամ։

 

Կոտայքի մեկ այլ համայնքում՝ Ակունքում, ՔՊ-ի ցուցակը գլխավորում էր և հաղաթանակ է տարել Հունան Ռուբենյանը, որը 1996-ից է գլխավորում համայնքը։ 2012 և 2017 թվականների համայնքապետի ընտրություններում նա ևս եղել է «Բարգավաճ Հայաստան» կուսակցության անդամ։ Հատկանշական է, որ Ռուբենյանի ղեկավարած համայնքի խոշոր գնումների մասին 2018-ի հունիսին ահազանգում էր վարչապետ Նիկոլ Փաշինյանի «Հայկական ժամանակ» թերթը։

 

Ինչ է ստացվում` համայնքներում նախկինները, կիսաքրեական և կրիմինալ աշխարհի հետ կապ ունեցող անձինք ՔՊ-ի դեմքով կրկին իշխանության են գալիս և վերարտադրվում են` պահելով տասնյակ տարիներ ուզուրպացրած իշխանությունը, արդյո՞ք այս սցենարը կանխելու համար չէր տեղի ունեցել 2018 թվականի Թավշյա հեղափոխությունը: Ի վերջո, 2018-ին մարդիկ դուրս էին եկել փողով ազատվելու հենց այդ կիսաքրեական, կոռուպցիոն գործարքների մեջ թաթախված և ընտրակաշառքներ բաժանող կոնտինգենտի դեմ, որն այսօր ինչ-որ հրաշքով հաջողությամբ տեղ է գտնում արդեն հեղափոխական թիմի նախընտրական ցուցակում և նույնիսկ հաղթում է...