The Economic Times. ԵՄ նոր սանկցիաները «անմարդկային» և «անարդյունավետ» են. Իրան

Իրանն այսօր դատապարտել է Եվրամիության նոր պատժամիջոցները՝ դրանք անվանելով «անմարդկային» և խոստանալով, որ դրանք երկրին չեն ստիպի նահանջել միջուկային ծրագրի հարցում, հայտնում է The Economic Times-ը:

Իրանի ԱԳ նախարարության խոսնակ Ռամին Մեհմանպարաստի մեկնաբանությամբ՝ դրանք մեծացնում են Իրանի համառությունը առ այն, որ այն կարող է դիմակայել Արևմուտքի տնտեսական ճնշումներին, որոնք նպատակ ունեն կանգնեցնելու Թեհրանի ուրանի հարստացումը: Արևմուտքն ու իր դաշնակիցները վախենում են, որ գործընթացը կարող է տանել միջուկային զենքի զարգացմանը, ինչը Իրանը հերքում է՝ նշելով, որ իր միջուկային ծրագիրը միայն խաղաղ նպատակներ է հետապնդում:

Հիշեցնենք, որ ԵՄ-ն արգելել էր նավթատարների մատակարարումը Իրան, ինչպես նաև որոշում էր կայացվել նոր ֆինանսատնտեսական պատժամիջոցներ գործի դնել Իրանի դեմ:

Մեհմանպարաստը պատժամիջոցներն անվանել է «անօրինական, անխոհեմ և անմարդկային»: