Թուրքական բանակը գտնվում է Սիրիայում, քանի որ «երկրի մեկ երրորդը գտնվում է ահաբեկիչների վերահսկողության տակ»․ Աքար

Թուրքիայի պաշտպանության նախարար Հուլուսի Աքարը Սիրիայի պաշտպանության նախարար և հետախուզության ղեկավար Մահմուդ Աբասի և Ռաֆիկ Շահադահի հետ հանդիպման ժամանակ ասել է, որ Սիրիայում թուրքական գործողության միակ նպատակը ահաբեկչության դեմ պայքարն է։ Դեկտեմբերի 28-ին Մոսկվայում կայացել է թուրքական և սիրիական կողմերի հանդիպումը, որի մանրամասները հայտնում է Sabah թերթը։

«Հանդիպման ժամանակ մենք շեշտել ենք, որ աջակցում ենք Սիրիայի տարածքային ամբողջականությանը և նրա ինքնիշխանությանը, և մեր միակ նպատակը ահաբեկչության դեմ պայքարն է։ Մենք նշել ենք, որ Սիրիայի տարածքի մեկ երրորդը վերահսկվում է ահաբեկչական խմբավորումների կողմից»,- ասել է Աքարը։

Թուրքիայի պաշտպանության նախարարության ղեկավարը պարզաբանել է, որ արգելված Քրդստանի աշխատավորական կուսակցության (PKK), Ժողովրդի պաշտպանության ջոկատի (YPG) և «Իսլամական պետության»  դեմ գործողությունն իրականացվում է զանգվածային միգրացիան կանխելու նպատակով։ Նրա խոսքով, հանդիպման արդյունքում Անկարան համաձայնել է շարունակել շփումները Դամասկոսի հետ։

Թուրքիայի և Սիրիայի ներկայացուցիչների միջև պաշտոնական բանակցությունները տեղի են ունեցել 11 տարվա մեջ առաջին անգամ։ Պարոն Աքարը դա «բավականին բնական» է համարում։ «Այստեղ շատ գործոններ և դերակատարներ են ներգրավված... չի կարելի սպասել, որ այս հանդիպման ժամանակ ամեն ինչ կորոշվի միանգամից»,- պարզաբանել է նա: Բացի այդ, նախարարը նշել է սիրիացի փախստականների անվտանգ և կամավոր վերադարձն ապահովելու անհրաժեշտությունը։

Դեկտեմբերի 28-ին եռակողմ բանակցություններ են տեղի ունեցել Ռուսաստանի, Սիրիայի և Թուրքիայի պաշտպանական գերատեսչությունների ղեկավարներ Սերգեյ Շոյգուի, Ալի Մահմուդ Աբասի և Հուլուսի Աքարի միջև։ Բանակցություններին մասնակցել են նաև Սիրիայի և Թուրքիայի հետախուզության ղեկավարներ Ռաֆիկ Շահադահը և Հաքան Ֆիդանը։

Ավելի վաղ սիրիական Al Watan թերթը գրել էր, որ Թուրքիան, Մոսկվայում կայացած բանակցություններից հետո, համաձայնել է դուրս բերել թուրք զինվորականներին Սիրիայի հյուսիսում իրենց վերահսկողության տակ գտնվող տարածքներից։