Ուկրաինան պատրաստվում է զանգվածային ձմեռային հարձակման. վերլուծաբան

Ատլանտյան խորհրդի վերլուծաբան Փիթեր Դիկինսոնն ասել է, որ ուկրաինական բանակը ուժեր է նախապատրաստում ձմեռային զանգվածային հարձակման համար: Այս մասին հայտնում է Euronews-ը։

Նրա կարծիքով, այս հարձակումը վճռորոշ կլինի Ուկրաինային միջազգային աջակցությունը պահպանելու համար պայքարում։

Դիկինսոնը նաև նշել է, որ այժմ Ուկրաինայի զինված ուժերը զորքեր են պատրաստում և սկսում են զինամթերք խնայել, որպեսզի հարվածներ հասցնեն մինչև զրոյական ջերմաստիճանի ազդեցության տակ գետնի սառչելը։ Նա նաև վստահություն է հայտնել, որ ուկրաինական ուժերը պետք է պահպանեն հարձակողական գործողությունների հաջող թափը, որը ցույց տվեցին աշնանը՝ ռազմական գործողություններում շրջադարձային կետի հասնելու համար։

Ավելի վաղ Associated Press-ը, վկայակոչելով Sibylline անվտանգության խորհրդատվական ընկերության ղեկավար Ջասթին Քրամփին, հայտնել էր, որ Ուկրաինայում ռազմական գործողությունները կարող են սրվել հողի սառցակալումից հետո։

Մինչ այս Ուկրաինայի պաշտպանության նախարարության ղեկավար Ալեքսեյ Ռեզնիկովը հայտարարել էր, որ ուկրաինական բանակը «չի ծրագրում կանգ առնել» ձմռանը։