Հունաստանը պարիսպ կկառուցի Թուրքիայի հետ սահմանի ողջ երկայնքով

Հունաստանը Էվրոս գետի երկայնքով Թուրքիայի հետ ցամաքային սահմանի ողջ երկարությամբ պարիսպ կկանգնեցնի, հունվարի 7-ին հայտարարել է երկրի քաղաքացիների պաշտպանության նախարար Տակիս Թեոդորիկակոսը։

«Արտաքին գործերի և պաշտպանության կառավարական խորհուրդը որոշում է կայացրել՝ պարիսպ կառուցել Էվրոս գետի ողջ երկարությամբ, այսինքն՝ Թուրքիայի հետ Հունաստանի և Եվրոպայի սահմաններին։ Դրա ընդհանուր երկարությունը 140 կմ է»,- ասել է նա։ Նրա խոսքերը մեջբերում է երկրի քաղաքացիների պաշտպանության նախարարության մամուլի ծառայությունը։

Թեոդորիկակոսը նշել է, որ առաջին 35 կմ-ի շինարարությունը կսկսվի անմիջապես: Դրա համար Հունաստանի կառավարությունը նախատեսում է 100 մլն եվրո հատկացնել։

«Մեր հարևանները շատ լավ գիտեն, որ դժբախտ մարդկանց շարունակական շահագործման համար տեղ չկա։ Հունաստանի սահմանները Էվրոսում անառիկ են, և դրանում կասկած չկա»,- ընդգծել է նախարարը։

Նրա խոսքով՝ անցյալ տարի Հունաստանը կանխել է 256 հազար անօրինական միգրանտների անօրինական մուտքը երկիր։ Բացի այդ, երկրի ոստիկանությունը ձերբակալել է 1,3 հազար մարդկանց փոխադրողների։

«Մենք վերջ դրեցինք անօրինական ներգաղթին։ Հույները կարող են վստահ լինել, որ մենք արդյունավետորեն լուծում ենք ապօրինի ներգաղթի խնդիրը, որն ուղղորդում և օգտագործում է հարևան Թուրքիան»,- եզրափակել է նախարարը։

Հունաստանի իշխանությունները Թուրքիայի հետ ցամաքային սահմանին արգելապատնեշ են կառուցում 2020 թվականից։ Մինչ օրս արգելապատնեշի մի հատվածը 37,5 կմ երկարությամբ արդեն տեղադրվել է։