Ուկրաինան Վրաստանին կոչ է արել Սահակաշվիլիին արտահանձնել Կիևին

Ուկրաինայի արտաքին գործերի նախարարությունը «անմարդկային» է համարում Վրաստանի իշխանությունների վերաբերմունքն այս երկրի նախկին նախագահ Միխեիլ Սահակաշվիլիի նկատմամբ և կոչ է անում Թբիլիսիին նրան հանձնել Կիևին, գրում է Ռիա Նովոստին։

Ավելի վաղ Սահակաշվիլիի ընտանիքի անդամները և ընդդիմադիր «Միացյալ ազգային շարժում» կուսակցության ներկայացուցիչները հայտնել էին, որ առողջական ծանր վիճակի պատճառով՝ Սահակաշվիլին տեղափոխվել է վերակենդանացման բաժանմունք։ Ավելի ուշ Vivamed կլինիկայի տնօրենը, որտեղ քաղաքական գործիչը բուժում է անցնում, հերքել է այս տեղեկությունը։

«Ուկրաինայի արտաքին գործերի նախարարությունը խստորեն բողոքում է Վրաստանում ճաղերի հետևում գտնվող Ուկրաինայի քաղաքացի Միխեիլ Սահակաշվիլիի անմարդկային վերաբերմունքի դեմ։ Մենք կոչ ենք անում վրացական իշխանություններին անհապաղ դադարեցնել ծաղրը Միխեիլ Սահակաշվիլիի նկատմամբ և հանձնել նրան Ուկրաինային։ Այս մասին ասվում է Ուկրաինայի ԱԳՆ կայքում տեղադրված հաղորդագրության մեջ։

Գերատեսչությունը նաև կոչ է արել միջազգային կազմակերպություններին «հրապարակայնորեն ոտքի կանգնել՝ ի պաշտպանություն Ուկրաինայի քաղաքացու»։