Ֆրանսիան փակում է հյուպատոսությունը Ստամբուլում

Ստամբուլում Ֆրանսիայի գլխավոր հյուպատոսությունը դադարեցրել է աշխատանքը, սա 5-րդ երկիրն է, որը նման քայլի է դիմում, գրում են միջազգային ԶԼՄ-ները։

Թուրքիայի ներքին գործերի նախարար Սուլեյման Սոյլուն հինգշաբթի օրը մի շարք եվրոպական երկրների կողմից Ստամբուլում իրենց հյուպատոսությունների փակումը ահաբեկչական հարձակումների սպառնալիքի մասին ԱՄՆ-ի հայտարարությունների ֆոնին անվանել է «հոգեբանական պատերազմ» երկրի դեմ։

«Հինգշաբթի՝ փետրվարի 2-ին և ուրբաթ՝ փետրվարի 3-ին Ստամբուլում Ֆրանսիայի գլխավոր հյուպատոսությունը փակ է հանրության համար: Վարչական հարցերի համար մեզ հետ կարելի է կապ հաստատել էլեկտրոնային փոստով»,- հայտնել են հյուպատոսությունից:

Ավելի վաղ Ստամբուլում Շվեդիայի, Նիդեռլանդների, Մեծ Բրիտանիայի և Գերմանիայի գլխավոր հյուպատոսությունները հայտարարել էին, որ դադարեցրել են այցելուներ ընդունել քաղաքի կենտրոնում ահաբեկչական հարձակումների սպառնալիքի պատճառով։

Ռուսաստանի Դաշնության հյուպատոսությունը հայտնել է, որ այն շարունակում է աշխատել սովորական ռեժիմով։ Ստամբուլում ԱՄՆ գլխավոր հյուպատոսությունը չի նախատեսում դադարել այցելուներ ընդունել  քաղաքում ահաբեկչական հարձակումների սպառնալիքի պատճառով։