Ռուսաստանը մասնատելու Արևմուտքի փորձերը դատապարտված են ձախողման․ Շոյգու

ՌԴ պաշտպանության բանակի գեներալ Սերգեյ Շոյգուն, Ռուսաստանի բանակի կենտրոնական ակադեմիական թատրոնում կայացած գալա երեկոյի ժամանակ, շնորհավորելով զինվորականներին Հայրենիքի պաշտպանի օրվա առթիվ, ասել է, որ Արևմուտքը միշտ ձգտել է մասնատել Ռուսաստանը, բայց դա չի հաջողվի,մեջբերում է ՌԻԱ Նովոստին։

«Այսօր մենք կրկին լուրջ վտանգի տակ ենք։ Օգտագործելով Ուկրաինան՝ հավաքական Արևմուտքը ձգտում է մասնատել Ռուսաստանը, զրկել նրան անկախությունից։ Այդ փորձերը դատապարտված են ձախողման»,- ընդգծել է Շոյգուն։

Ռուսաստանի Դաշնության զինված ուժերը հանդիսանում են ազգային անվտանգության և երկրի կայուն զարգացման երաշխիքը, նշել է Շոյգուն։ Նա հայտարարել է, որ ռուս զինվորներն ու սպաներն այսօր պաշտպանում են այն, ինչի համար կռվել են իրենց պապերն ու նախապապերը, նրանց համար հայրենիքի բարօրությունն ու անվտանգությունը միշտ եղել է բարձրագույն արժեք։

«Մեզ՝ նրանց իրավահաջորդների համար հայրենիքին նվիրվածությունը գլխավոր արժեք է, Ռուսաստանի անկախության հուսալի հենարանը»,- ասել է պաշտպանության նախարարը՝ շնորհակալություն հայտնելով նրանց, ովքեր կռվում են առաջնագծում։