Ուկրաինայի կողմից ագրեսիայի դեպքում Մինսկը կստանա միջազգային հանրության աջակցությունը․ Լուկաշենկո

Բելառուսի նախագահ Ալեքսանդր Լուկաշենկոն ասել է, որ Ուկրաինայի կողմից ագրեսիայի դեպքում պատերազմը կստանա բոլորովին այլ բնույթ, նման սցենարի դեպքում Մինսկը կստանա ամբողջ միջազգային հանրության, այդ թվում՝ Չինաստանի աջակցությունը։ Այս մասին նա ասել է չինական լրատվամիջոցներին տված հարցազրույցում, փոխանցում է բելառուսական «ԲելՏԱ» գործակալությունը։

Ինչպես նշել է Լուկաշենկոն, Բելառուսը պատերազմ չի ցանկանում և չի պատրաստվում հարձակվել Ուկրաինայի վրա, հատկապես այն պատճառով, որ ուկրաինացիները բելառուս ժողովրդի համար օտար չեն։ Նույնիսկ իմ նախնիները ծնվել են Ուկրաինայում՝ Չեռնիգովի և Կիևի միջև, ասել է նա։

«Բայց Աստված մի արասցե, եթե Բելառուսի պետության դեմ ագրեսիա իրականացվի Ուկրաինայի տարածքից՝ մենք ստիպված կլինենք պատասխանել։ Եվ ես վստահ եմ, որ այստեղ մենք կստանանք ողջ միջազգային հանրության, այդ թվում՝ Չինաստանի Ժողովրդական Հանրապետության աջակցությունը»,- ասել է հանրապետության ղեկավարը։

Նրա խոսքով, Ուկրաինայի կողմից Բելառուսի տարածքի վրա ագրեսիայի դեպքում Մինսկը կպատասխանի, «բայց դա կլինի բոլորովին այլ պատերազմ», «այն ակնթարթորեն այլ բնույթ կստանա»։ Նա ընդգծել է, որ նման սցենարի դեպքում բելառուսական բանակը կպաշտպանի իր հողը, այդ թվում՝ ռուսական զորքերի հետ միասին։

Միաժամանակ նա հավելել է, որ Բելառուսին հակամարտության մեջ ներքաշելու համար Լեհաստանի, Լիտվայի և Ուկրաինայի տարածքներում զորքերի կենտրոնացում չի նկատվել։