Բայդենը Համաշխարհային բանկի նախագահի պաշտոնում առաջադրել է Mastercard-ի նախկին գործադիր տնօրենին

ԱՄՆ նախագահ Ջո Բայդենը հինգշաբթի հայտարարել է, որ առաջադրում է Mastercard-ի նախկին գործադիր տնօրեն Աջայ Բանգային Համաշխարհային բանկի (ՀԲ) նախագահի պաշտոնում, հայտնում է Սպիտակ տունը։

«Նախագահ Բայդենը հայտարարել է, որ Միացյալ Նահանգները Համաշխարհային բանկի նախագահի պաշտոնում առաջադրում է Աջայ Բանգային (...)»,- ասվում է հաղորդագրության մեջ։

Հայտարարության մեջ Բայդենն ասել է, որ Բանգան անհրաժեշտ փորձ ունի այդ պաշտոնի համար, մասնավորապես՝ «մեր ժամանակի ամենահրատապ խնդիրները լուծելու համար, այդ թվում՝ կլիմայի փոփոխության հարցը»։

63-ամյա Բանգան ներկայումս General Atlantic-ի փոխնախագահն է, նախկինում Mastercard-ի գործադիր տնօրենն է եղել:

Բանգան ծնվել է Հնդկաստանում, բայց ունի ամերիկյան քաղաքացիություն։