Մեծ Բրիտանիան արգելք է սահմանել ռուսական ադամանդի և մետաղների ներմուծման վրա

Մեծ Բրիտանիայի կառավարությունը կարգելի Ռուսաստանի Դաշնությունից պղնձի, ալյումինի և նիկելի, ինչպես նաև ադամանդի ներկրումը։ Այս մասին ասվում է Միացյալ Թագավորության վարչապետ Ռիշի Սունակի գրասենյակի տարածած հայտարարության մեջ։

«Այս տարվա վերջին մենք օրինական կերպով կարգելենք ռուսական ադամանդի ներկրումը և ամբողջությամբ կդադարեցնենք ռուսական ծագման պղնձի, ալյումինի և նիկելի ներկրումը` ելնելով ռուսական երկաթի և պողպատի ներկայիս արգելքներից»,- ասվում է փաստաթղթում։ Այն հիշեցնում է, որ 2022 թվականի գարնանը Լոնդոնն արդեն պատժամիջոցներ է սահմանել ադամանդ արդյունահանող ռուսական Alrosa ընկերության դեմ և լրացուցիչ 35 տոկոս մաքսատուրքեր սահմանել ռուսական արտադրության ադամանդների վրա։ Ռուսաստանի Դաշնությունից ադամանդի, պղնձի, նիկելի և ալյումինի ներմուծման արգելքների ուժի մեջ մտնելու ժամկետները չեն նշվում։

Հայտարարության մեջ նաև նշվում է, որ Մեծ Բրիտանիան սահմանափակումներ կմտցնի 86 ռուսաստանցի ֆիզիկական անձանց և ռազմարդյունաբերական համալիրի ընկերությունների և այն հատվածների նկատմամբ, որոնք Ռուսաստանի Դաշնության բյուջեն ապահովում են արտահանման եկամուտներով։ 

Հայտարարությունը հրապարակվել է Ճապոնիայի Հիրոսիմա քաղաքում Յոթնյակի խմբի (G7) եռօրյա գագաթնաժողովի բացումից առաջ։ Ըստ Մեծ Բրիտանիայի վարչապետ Սունակի՝ «Մեծ յոթնյակը միասնական է Ռուսաստանի սպառնալիքի հանդեպ և անդրդվելի է Ուկրաինային աջակցելու հարցում»: