Ինչպես են «պլստում» Փաշինյանի՝ կասկածելի գործարքների մեջ մեղադրվող թիմակիցները

Հայաստանում դեռ կարելի է «լուծել» ինչ-որ հարցեր կոռուպցիայի միջոցով, սակայն իշխանությունները չեն նահանջի իրենց սկզբունքային պայքարից։ Այս մասին Ազգային ժողովում, խորհրդարանական մշտական հանձնաժողովների համատեղ նիստում, 2024թ. պետական բյուջեի նախագծի քննարկման ժամանակ՝ հոկտեմբերի 30-ին, ասել է ՀՀ վարչապետ Նիկոլ Փաշինյանը։ Նա կոռուպցիայի հնարավոր ակտիվացումը համարում է երկրի մակրոտնտեսական կայունության լուրջ սպառնալիքներից մեկը։ «Մենք պետք է ուժեղացնենք մեր սկզբունքային պայքարը դրա դեմ»,- ասել է Փաշինյանը և ավելացրել, որ ներում-բեկում չի լինելու բոլոր նրանց համար, ովքեր կարծում են, որ կոռուպցիայով կարող են դեռ հարցեր լուծել:

Ուշագրավն այն է, որ անգամ Փաշինյանի թիմակիցների շրջանակում կան պաշտոնյաներ, որոնց անունները վերջին ամիսներին հնչեցվել են տարբեր կոռուպցիոն կամ առնվազն կասկածելի գործարքների համատեքստում, չարաշահումներ են հայտնաբերել նաև Հաշվեքննիչ պալատում, սակայն ներում-բեկում յուրայիններին, ինչպես տեսնում ենք, լինում է:

Դիցուք՝ Սիսիանի համայնքապետ նշանակված Արմեն Հակոբջանյանը 2019 թվականին Երևանի Նոր Նորք վարչական շրջանում որպես նվիրատվություն ստացել է բնակարան: Ընդ որում, հայտարարատուի և համասեփականատիրոջ միջև կապի բնույթը պաշտպանված է, հետևաբար որևէ կերպ դա պարզելը դառնում է անհնար:

Առողջապահության նախկին նախարար, այժմ ԱԺ պատգամավոր Արսեն Թորոսյանի ընտանիքը ձկնաբուծական բիզնես էր սկսել Արագածոտնի մարզի Ղազարավան գյուղում: «Ֆիշ Ֆարմ Մենեջմենթ» ՍՊԸ-ի բաժնետերերից մեկը թեև պաշտոնյայի հայրն է՝ գյուղում ձկնաբուծարանն ավելի հայտնի է որպես «Արսեն Թորոսյանի ձկնաբուծարան»: Պատկան մարմինները թեև ուսումնասիրել էին այս տեղեկատվությունը, սակայն, դրան որևէ ընթացք չի տրվել, այնուհետև մամուլում հայտնվեցին նորություններ առ այն, որ Թորոսյանը վաճառել է վերը նշված ձկնաբուծարանները:

Գլխավոր դատախազությունն ուսումնասիրել է Հակակոռուպցիոն կոմիտեի նախագահ Սասուն Խաչատրյանի կողմից շուկայականից զգալի ցածր գնով բնակարան ձեռք բերելու առնչությամբ հրապարակումը, սակայն դրան ընթացք չի տվել:

Ամիսներ առաջ ՊՎԾ ղեկավար Ռոմանոս Պետրոսյանը նախորդ օրը Հանրային հեռուստաընկերության եթերում ինքնախոստովանություններով հանդես եկավ, թե ինչպես են հետհեղափոխական ժամանակահատվածում Պետական առողջապահության գործակալությունում՝ ՊԱԳ-ում, գրանցվել կոռուպցիոն բնույթի սկանդալներ: Սակայն նախարար Անահիտ Ավանեսյանը մինչ այս պահը նույնիսկ չի հարցաքննվել:

Վայոց ձորի մարզի Վայք համայնքի ղեկավար Մխիթար Մաթևոսյանն ընդհանուր 537 միլիոն դրամի պայմանագրեր է կնքել իր կնոջը պատկանող ընկերության հետ, ընդ որում՝ մինչև 2022 թվականն այդ ընկերությունը ղեկավարել է հենց ինքը՝ Մխիթար Մաթևոսյանը, սակայն համայնքի ղեկավար ընտրվելուց հետո ընկերության իր բաժնեմասն ու կառավարումը հանձնել է կնոջը՝ Մերի Մարգարյանին։ Այստեղ նույնպես որևէ իրավական գործընթաց չմեկնարկեց:

Մամուլում նախորդ տարի մեծ աղմուկ բարձրացրեց կառավարական առանձնատների վերանորոգման հարցը: Ըստ լուրերի՝ կառավարական առանձնատների վերանորոգման համար 2 մլն դոլար էին ծախսել և այստեղ առկա էր բացահայտ կոռուպցիոն ռիսկ: Կոնդի առանձնատների տնտեսություն ՊՈԱԿ-ի տնօրենի լիազորությունները կատարում էր Արուսյակ Մանավազյանը, ով այսօր արդեն ԱԺ պատգամավոր է։

«Փաստերի ստուգման հարթակն» ուսումնասիրել է ԱԺ պատգամավոր, վարչապետ Նիկոլ Փաշինյանի ընտանիքի մտերիմ Հայկ Ղալումյանի (ՔՊ) և նրա ընտանիքի անդամների՝ վերջին մի քանի տարիների հայտարարագրերը։ Արդյունքում՝ մի շարք անճշտություններ ու անհամապատասխանություններ են վեր հանվել։ Ըստ Ղալումյանի՝ Կոռուպցիայի կանխարգելման հանձնաժողով ներկայացրած գույքի և եկամուտների հայտարարագրերի՝ պատգամավորը և նրա ընտանիքի անդամներն իրենց հայտարարագրերի մի մասը կամ ոչ ճիշտ են լրացնում կամ թաքցնում են որոշ էական տվյալներ։

ՀՀ հաշվեքննիչ պալատը 2022 թվականի ընթացքում խախտումներ է արձանագրել Հակոբ Սիմիդյանի գլխավորած՝ ՀՀ շրջակա միջավայրի նախարարությունում: Մասնավորապես, ՀՀ շրջակա միջավայրի նախարարությունում անտառօգտագործման գործընթացի նկատմամբ կատարողականի հաշվեքննությամբ արձանագրվել է, որ, օրինակ, «Հայանտառ» ՊՈԱԿ-ի կողմից կնքված թվով 9 վարձակալության պայմանագրերում պետական սեփականություն հանդիսացող անտառների վարձավճարների՝ օրենսդրությամբ սահմանված նվազագույն չափը չպահպանելու արդյունքում, հաշվեքննողների հաշվարկներով, անտառտնտեսության թվով 5 մասնաճյուղերում ընդհանուր վարձակալված 36,7 հա անտառային հողատարածքներից 2019-2020թթ. ժամանակահատվածում 14,086.5 հազ. դրամի վարձավճարներ չեն գանձվել:

ՀՀ Հաշվեքննիչ պալատը խախտումներ է հայտնաբերել էկոնոմիկայի նախարարության կողմից գյուղատնտեսական կենդանիների պատվաստումների ժամանակ։  Խախտումներ են հայտնաբերվել նաեւ գյուղատնտեսական վարկերի տոկոսադրույքների սուբսիդավորման, գյուղատնտեսական հումքի գնման կամ ներմուծման նպատակով ագրովերամշակման ոլորտին տրամադրվող վարկերի տոկոսադրույքների սուբսիդավորման հարցում։ Խախտումներ են հայտնաբերվել նաեւ տնտեսության ոլորտում պետական ​​քաղաքականության մշակման ծրագրերի համակարգման եւ մոնիտորինգի, ինչպես  կորոնավիրուսով պատճառով առաջացած տնտեսական հետեւանքների չեզոքացման նպատակով տրամադրվող վարկերի տոկոսադրույքների սուբսիդավորման ծրագրի շրջանակներում:

ԲՏԱ նախարարությունը մեկ անձից գնման ընթացակարգով 24,444,445 դրամի անշարժ գույք է ձեռք բերել Արմեն Մաշուրյանից։ Անշուշտ, մեկ անձից կատարված գնումները, այն էլ բազմամիլիոնանոց գնումները մշտապես իրենցից կոռուպցիոն ռիսկ են ներկայացնում: