Փարիզում ոստիկանները կրակել են փարանջայով կնոջ վրա, ով սպառնացել է գնացքում իրեն պայթեցնել

Փարիզի ոստիկանները մետրոյի կայարանում կրակել են փարանջայով մի կնոջ վրա՝ կապված իսլամիստների կողմից ենթադրյալ ահաբեկչական սպառնալիքի հետ։ Ֆրանսիայի մայրաքաղաքի ոստիկանապետ Լորան Նունյեսի խոսքով՝ առավոտյան պիկ ժամին կինը բղավել է «Դուք բոլորդ կմեռնեք» և «Ալլահ աքբար»: Նա սպառնալից վարք է դրսևորել, ահաբեկչությունների ժամանակ իսլամիստ ծայրահեղականները հաճախ են բղավում «Ալլահ աքբար» արտահայտությունը։ «Ուղևորներն ասում են, որ փարանջայով կինն օգտագործել է «ագրեսիվ, ջիհադիստական ​​լեզու»», - հավելել է կառավարության խոսնակ Օլիվյե Վերանը:

Ժամանելով դեպքի վայր՝ ոստիկանները մի կողմ են տարել կնոջը և խնդրել հանգստանալ: Նրանք նաև խնդրել են կնոջը ցույց տալ ձեռքերը՝ բացառելու հավանականությունը, որ նա իրական վտանգ է ներկայացնում։ Դատախազությունը բացատրել է, որ կինը հրաժարվել է «կատարել ոստիկանների պահանջները», ինչպես նաև սպառնացել է «պայթեցնել իրեն»։ Դրանից հետո ոստիկաններին այլ ելք չի մնացել, քան կրակ բացել կնոջ վրա, «քանի որ այդ իրավիճակում նա վտանգ էր ներկայացնում»։

Նշվում է, որ կինը վնասվածք է ստացել որովայնի հատվածում։ Նրան տեղափոխել են մոտակա հիվանդանոց: «Նա ծայրահեղ ծանր վիճակում է»,– ասել է ոստիկանապետ Նունյեսը։

Հաղորդվում է, որ կնոջ վրա պայթուցիկ չի հայտնաբերվել։ Նրա ինքնությունը դեռ պարզված չէ։