Ուր են և ինչու են լռում Հայաստանի խոշոր գործարարներն ու պաշտոնյաները. Գոռ Ասրյան

ԼՈւՐԵՐ.com-ը շարունակում է անդրադառնալ այն պաշտոնյաներին և գործարարներին, ովքեր երկար տարի զբաղեցրել են պետական և ռազմական պաշտոններ, Արցախի և Հայաստանի անունը հոլովելով բիզնես են դիզել, իսկ այսօր, երբ Արցախը գրեթե կորսված է, իսկ Հայաստանը գտնվում է լրջագույն վտանգների առջև, նրանք նախընտրում են լռել, ասես ոչինչ էլ տեղի չի ունեցել:

Այսօր կանդրադառնանք Լոռու մարզպետի տեղակալ Գոռ Ասրյանին:  Վերջինս մինչ այս բարձր պաշտոնին նշանակվելը իշխող քաղաքական ուժի և կարելի է ասել՝ ընդհանրապես քաղաքականության հետ որևէ առընչություն չի ունեցել: Ահա նրա կենսագրությունից որոշ ուշագրավ դրվագներ․  2008- 2013թթ. աշխատել է «ՖԻՆՔԱ» ՈՒՎԿ ՓԲԸ «Ստեփանավան» մասնաճյուղում՝  որպես վարկային մասնագետ: 2013-2019թթ. աշխատել է «ՖԻՆՔԱ» ՈՒՎԿ ՓԲԸ «Ստեփանավան» մասնաճյուղում՝  որպես ավագ վարկային մասնագետ: 2019- 2020թթ. աշխատել է «Բարձրավոլտ Էլեկտրացանցեր» ՓԲԸ «Հյուսիսային» մասնաճյուղում՝ որպես տնօրենի տեղակալ: 2011 թվականի ընթացքում ցուցաբերած լավագույն աշխատանքի համար պարգևատրվել է շնորհակալագրով։ 2013թ. պարգևատրվել է շնորհակալագրով բնակչության ամենաանապահով խավի կենսամակարդակի բարձրացմանն ուղղված ինովացիոն մտքերի համար։ «ՖԻՆՔԱ» բրենդը անվերապահորեն կրելու և սկզբունքներին հետևելու համար 2015թ. պարգևատրվել է շնորհակալագրով։

Ամիսներ առաջ փոխմարզպետը մասնակցում էր Արցախից բերված շուրջ 170 տարվա պատմություն ունեցող գորգերի ցուցահանդեսին, որը տեղի էր ունենում Վանաձորում: Այդ միջոցառման ընթացքում Ասրյանը նշել էր, որ Շուշիի գորգերն ապացույցն են մեր դարավոր պատմության, մեր հայ մշակույթի շարունակության: Նմանօրինակ բացօթյա ցուցադրությունները ևս մեկ միջոց են մեր մշակույթը, մեր պատմությունը ցուցադրելու և փոխանցելու գալիք սերունդներին: Մի քանի ամիս առաջ էլ փոխմարզպետը Արցախյան երկրորդ պատերազմում անմահացած կամավորական Արամ Ավագյանի կնոջն էր հանձնել հերոսին հետմահու շնորհված պետական պարգևը: Արդյո՞ք Արցախի կորստից հետո Ասրյանի մոտ հարցեր չեն առաջացել իր քաղաքական թիմին, հաշվի առնելով, որ հենց այդ քաղաքական թիմի վարած ապաշնորհ քաղաքականության արդյունքում է, որ այսօր Շուշիի հնամենի գորգերը ցուցադրված են ոչ թե Շուշիի թանգարանում, այլ Վանաձորում և Հայաստանի մյուս խոշոր քաղաքներում: Ի վերջո, Ասրյանը այսպես ասած՝ քայլած հեղափոխական չէ, երկար տարիներ աշխատել է հանրային սեկտորում՝ ի շահ Հայաստանի, ինչու ոչ նաև Արցախի բնակչությանը: Սակայն այսօր, երբ վերջինս արդեն բարձր պաշտոնի է նշանակվել, Հայաստանում և Արցախում ստեղծված իրավիճակի շուրջ պահպանվող լռության գինը, կարծես թե, հենց այդ պաշտոնն է:

Շարունակելի...