Բարձրագույն կրթության և գիտության կոմիտեի նախագահը մեկնաբանել է բուհերի խոշորացման վերաբերյալ շրջանառվող լուրերը

ՀՀ բարձրագույն կրթության և գիտության կոմիտեն համատեքստից կտրված և խեղաթյուրված է համարում մամուլում հրապարակումները, որոնցում ներկայացվում է  ՀՀ բուհերի և գիտական կազմակերպությունների 5 ուղղությունների ամբողջական ցանկն ու դրա շրջանակներում բուհերի օպտիմալացումն ու խոշորացման ծրագրի իրականացումը:

«Արմենպրես»-ի հաղորդմամբ՝ մարտի 11-ին հրավիրած մամուլի ասուլիսում այս մասին հայտարարեց ՀՀ բարձրագույն կրթության և գիտության կոմիտեի նախագահ Սարգիս Հայոցյանը:

«Խոսքը վերաբերում է համապատասխան ուղղություններով ձևավորված աշխատանքային խմբերին, որոնք քննարկումներ կծավալեն, իսկ կլաստերների կառուցվածքը մշակվելու է  առաջիկա աշխատանքների ընթացքում, որոնց ժամանակ քննարկվելու և դիտարկվելու են ներառված բոլոր բուհերի և կազմակերպությունների առաջարկները, մտահոգությունները և դիտողությունները»,- նշեց նա:

Հայոցյանը նկատեց՝ Ակադեմիական քաղաքի հայեցակարգով նախատեսվում է ոչ թե 5, այլ 6 կլաստեր, որոնցից մեկի՝ սպայական կլաստերի կառուցվածքի և բովանդակության վերաբերյալ քննարկումները հանրային ձևաչափով չեն նախատեսվում՝ հաշվի առնելով ոլորտին առնչվող առանձնահատկությունները:

 «2023 թվականի հուլիսին ԿԳՄՍ նախարարի հրավերով ՀՀ գործող բուհերին և պետական գիտական կազմակերպություններին առաջարկվել էր քննարկել և մինչև 2024 թվականի փետրվարի 15-ը ներկայացնել հայեցակարգային առաջարկություններ ՀՀ պետական բուհերի խոշորացման և գիտահետազոտական կազմակերպությունների հետ միավորման գործընթացի վերաբերյալ:

Հայաստանի Հանրապետությունը կրթության զարգացման ռազմավարության շրջանակներում, կրթության և գիտության ոլորտում բարեփոխումների լայնածավալ գործընթացի շրջանակներում կազմակերպել է բուհերի և գիտական կազմակերպությունների խոշորացման ու դրանց միավորման գործընթաց։ Ներքին քննարկումների արդյունքում առաջարկվել է  խոշորացված բուհերի 6 կլաստերային ուղղություններ»,-ասաց Հայոցյանը։

Նրա խոսքով՝  գիտական կազմակերպություններին և բուհերին առաջարկվել է 7 ամիսների ընթացքում կազմակերպել ներքին քննարկումներ ու առաջարկել իրենց տեսակետը, թե այդ միավորումներում որտեղ են իրենց տեսնում, ինչ կառավարման առաջարկներ, մտահոգություններ ունեն և այլն։

Ըստ Հայոցյանի՝ դրան զուգահեռ բոլոր շահառու կազմակերպություններին առաջարկվել է ներկայացնել պաշտոնական ներկայացուցիչներին, ովքեր կմասնակցեն հայեցակարգային քննարկումներին։

«Հիմա ներկայացուցիչները պաշտոնապես ներկայացվել են, առաջարկությունները՝ պաշտոնապես ուղարկվել։ Մարտի 15-ին առաջարկություններն ուսումնասիրվել են, հաշվի առնելով այն 6 ուղղությունները, որոնք նախապես հայտարարվել էր` ձևավորվել են աշխատանքային խմբեր այդ կազմակերպությունների ներկայացուցիչների մասնակցությամբ։ Այդ աշխատանքային խմբերում արդեն մեկնարկում են այդ կլաստերների բովանդակության, կառավարման և այլ մանրամասների վերաբերյալ քննարկումները»,-մանրամասնեց Բարձրագույն կրթության և գիտության կոմիտեի նախագահը՝ հավելելով, որ  որոշ կազմակերպություններ առաջարկությանը դրական են արձագանքել, որոշները՝ բացասական։

Մասնավորապես՝ Երևանի Կոմիտասի անվան պետական կոնսերվատորիայի ղեկավարությունը Ֆեյսբուքի պաշտոնական էջում մարտի 11-ին հայտարարել է, որ արվեստի բուհերի  միավորման հարցի շուրջ իր կարծիքն ու դիրքորոշումը դեռևս անցյալ տարի է գրավոր ներկայացրել ԿԳՄՍ նախարարին, ինչպես նաև ռազմավարության մշակման հանձնախմբին և Բարձրագույն կրթության և գիտության կոմիտեի նախագահին։

«ԵՊԿ ռեկտոր Սոնա Հովհաննիսյանն իր և բուհի ղեկավար կազմի դիրքորոշումը հրապարակել է ԵՊԿ գիտական խորհրդի փետրվարյան նիստի ժամանակ։ Հանգամանորեն ներկայացվել են այս նախագծի հետ ԲՈւՀ-ի անհամաձայնության հիմնավորումներն ու առաջարկները»,-ասված է հայտարարության մեջ։

Հայոցյանի համոզմամբ՝ Կոնսերվատորիան, որպես ՀՀ պետական բուհերից մեկը, արվեստների ուղղությամբ  այս գործընթացի շահառու է։ Հետևաբար, պետք է մասնակցի այս գործընթացին։

«Որպես պետական լիազոր մարմին մեր գործառույթն է իրենց հետ քննարկել ու հասկանալ, թե որոնք են այն շփման կետերը, որոնց շուրջ կարելի է այս ամեն ինչը զարգացնել»,-ընդգծեց նա։

Անդրադառնալով Կոնսերվատորիայի շենքի վաճառքի վերաբերյալ լուրերին՝ Հայոցյանը շեշտեց, որ Կառավարության կողմից կա հստակ հանձնարարական՝ ներգրավելով միջազգային փորձագետների՝ կազմակերպել ազատված գույքի մենեջմենթի մեխանիզմ, որպեսզի առանց օտարման ու վաճառքի՝ դրա օգտագործումը համապատասխան եկամուտներ ապահովի Ակադեմիական քաղաքին։

«Այսինքն, խնդիր է դրվում թե ինչ մեխանիզմով է գույքը կառավարվելու, որ մաքսիմալ արդյունավետ, մեծ եկամուտով աշխատի, այդ եկամուտն էլ ուղղվի Ակադեմիական քաղաքի հետագա զարգացմանը և իր ծրագրերին, բայց ոչ կառուցմանը», - պարզաբանեց բանախոսը՝ հերքելով նաև լուրերը, թե Ակադեմիական քաղաքը կառուցվելու է հենց այդ  ազատվող գույքի հաշվին։

Նա հավաստիացրեց, որ միայն  կառուցման և ամբողջությամբ պատրաստ լինելու դեպքում է հնարավոր տեղափոխությունը։ Շահառու կազմակերպությունները, ինչպես նաև ոլորտում գործունեություն ծավալող այլ կազմակերպություններ, նախապես առաջադրել են ներկայացուցիչներ, որոնց մասնակցությամբ աշխատանքային խմբերի ձևաչափով առաջիկայում քննարկվելու են կլաստերների կառուցվածքին և կառավարման մոդելին վերաբերող հարցեր:

Ավելի վաղ մի շարք լրատվամիջոցներ հրապարակել էին 5 ուղղություններից բաղկացած մի ցանկ, որի շրջանակներում իրականացվելու է բուհերի օպտիմալացման կամ խոշորացման ծրագիրը: