Թրամփի դեմ մահափորձի ժամանակ ԱՄՆ Գաղտնի ծառայության աշխատանքում խախտումներ են հայտնաբերվել

ԱՄՆ Գաղտնի ծառայության աշխատանքում լուրջ խախտումներ են տեղի ունեցել ԱՄՆ նախագահի հանրապետական ​​թեկնածու Դոնալդ Թրամփի հուլիսյան հանրահավաքի ժամանակ, որտեղ մահափորձ է կատարվել։ Դրանք գերատեսչության ներքին հետաքննության արդյունքում բացահայտվել են, գրում է Washington Post-ը՝ հղում անելով երկու բարձրաստիճան պաշտոնյայի, ովքեր ծանոթ են հետաքննության արդյունքներին։

«Գաղտնի ծառայության հետաքննությունը հաստատել է անվտանգության միջոցառումներում թերությունների առկայությունը, որոնք նախադրյալներ են ստեղծել Դոնալդ Թրամփի մահափորձի համար, ինչպես նաև հայտնաբերել են նոր տեղեկություններ»,–գրում է թերթը։

Ըստ Washington Post-ի՝ պաշտոնյաներն ի սկզբանե ծրագրել են հսկայական սարքավորումներ և դրոշներ տեղադրել տանիքի, որտեղից կրակել են Թրամփին և այն բեմի միջև, որտեղ նա խոսում էր, բայց դա այդպես էլ չի արվել:

The Washington Post-ը նշում է նաև, որ լուրջ թերություններ են հայտնաբերվել տեղեկատվության փոխանցման համակարգում։ Այսպիսով, ծառայության գործակալների ռադիոսենյակը, որը պետք է իրական ժամանակում տագնապային ազդանշաններ ստանար պարեկային ոստիկանությունից, այդ ազդանշաններն ընդունելու հնարավորություն չուներ։

Պարբերականի տվյալներով՝ ոստիկանության ահազանգը ոչ բոլոր գործակալներին է ուղարկվել, իսկ կասկածյալի լուսանկարը, ով հետագայում կրակել է Թրամփին, ուղարկվել է ընդամենը մեկ սպայի։

Բացի այդ, ըստ հետաքննության, անվտանգության միջոցառումների համար պատասխանատու Գաղտնի ծառայության ստորաբաժանումը չէր շտապում ուժեղացնել Թրամփի պաշտպանությունը նույնիսկ այն բանից հետո, երբ ստացվել են հետախուզության տվյալներ, որոնք ցույց են տվել Իրանի կողմից քաղաքական գործչի դեմ հնարավոր մահափորձը։

Ըստ Washington Post-ի՝ այս հետաքննության արդյունքները կարող են հրապարակվել հաջորդ շաբաթ։ Հաղորդվում է, որ Գաղտնի ծառայության ղեկավարի ժամանակավոր պաշտոնակատար Ռոնալդ Ռոուն արդեն ներկայացրել է հետաքննության ամփոփումը կառավարության անդամներին մասնավոր ելույթներում և ասել, որ արդեն քայլեր է ձեռնարկել առկա թերությունները շտկելու համար։