Իրանն առաջարկում է ԱՄՆ-ին ուշադիր հաշվել իր անօդաչու սարքերը

Իրանի իսլամական հեղափոխության պահապան կորպուսի ներկայացուցիչ Ռամադան Շարիֆը, չորեքշաբթի օրը մեկնաբանելով ԱՄՆ-ի տարածած հերքողական լուրերն այն մասին, թե ԱՄՆ-ի բոլոր անօդաչու թռչող սարքերն իրենց տեղերում են, և Իրանը դրանցից ոչ մեկի նկատմամբ վերահսկողություն չի վերցրել, խորհուրդ է տվել ԱՄՆ-ին ևս մեկ անգամ ուշադիր հաշվել իր անօդաչու սարքերը. հայտնում է Риа Новости-ն:

«Վաղ թե ուշ ամերիկացիները ստիպված են լինելու հաստատել, որ դա իրենց ինքնաթիռն է եղել: Իսկ այժմ մեզ մնում է ԱՄՆ-ին խորհուրդ տալ նորից հաշվել իր անօդաչու սարքերը»,-ասել է Շարիֆը Ալ Ալամին տված հարցազրույցի ժամանակ:

Երեքշաբթի օրը Իրանի զինվորական հրամանատարությունը հայտարարել էր ամերիկյան անօդաչու թռչող Boing ScanEagle սարքի գրավման մասին, որը, Իրանի պնդմամբ, հետախուզական գործողություններ էր իրականացնում Պարսից ծոցի ծովային տարածքներում: Ալ Ալամ հեռուստաընկերությունն ավելի ուշ ցուցադրում էր կադրեր, որտեղ երևում էր, որ Իսլամական հեղափոխության պահապան կորպուսի սպաներն ուսումնասիրում են սարքը: ԱՄՆ-ը հերքում է լուրերն այն մասին, թե անօդաչու սարքավորում է կորցրել, որը, նրա պնդմամբ, չի էլ խախտել Իրանի տարածքային սահմանները, այլ թռիչք է իրականացրել միջազգայնորեն չեզոք համարվող գոտիներում:

Հիշեցնենք, որ նման միջադեպ վերջին անգամ գրանցվել էր ս.թ. նոյեմբերի 1-ին, երբ ԱՄՆ-ի հետախուզության Predator անօդաչու ինքնաթիռները հարձակման էին ենթարկվել Պարսից ծոցում գտնվող իրանական կործանիչների կողմից: Օդանավը վայր է ընկել առանց պայթյունի և անվնաս մնալով՝ կրկին վերադարձել ռազմաբազա:

ԱՄՆ-ն այդ ժամանակ հայտարարել էր, որ անօդաչուները թռիչք են իրականացրել միջազգային չեզոք օդային տարածքներում: