Ինչ մեքենա է վարում Մարկ Ցուկերբերգը

Facebook-ի հիմնադիր Մարկ Ցուկերբերգը երկար տարիներ ենթարկվել է ծաղրի իր ձանձրալի եւ ռոբոտացված կերպարի պատճառով։ Բայց վերջին ժամանակներս միլիարդատերն իր առջեւ խնդիր է դրել լիովին վերանայել իր հանրային կերպարը։ Թեեւ ամեն բան սկսվել է խառը մրցամարտերի եւ ֆիթնեսի հանդեպ նրա հետաքրքրությունից, այժմ Ցուկերբերգը ուշադրությունը կենտրոնացրել է թանկ եւ զիլ իրերի վրա։ 

Այն բանից հետո, երբ այս տարի նա մեգազբոսանավ գնեց 300 մլն դոլարով եւ մի խուրձ հազվադեպ ու շատ թանկ շքեղ ժամացույցներ, Meta-ի գլխավոր տնօրենը, ըստ երեւույթին, լիովին թարմացրել է նաեւ մեքենաների իր հավաքածուն։ Հիմա նա սպորտային Cadillac է վարում։ 

Վերջերս Ցուկերբերգն Instagram-ում հրապարակել էր տեսանյութ, որտեղ օգտագործում է Ray-Ban Meta խելացի ակնոցներ, որպեսզի գտնի իր մեքենան կայանատեղիում։ Մեկնաբանությունների բաժնում Hoonigan-ի համահիմնադիր Բրայան Սքոտոն Ցուկերին հարցրել է, թե ինչ է նա վարում։ Վերջինը պատասխանել է. «Վերջին ժամանակներս հիմնականում Cadillac CT5-V Blackwing, բայց երբեմն՝ նաեւ այլ մեքենաներ»։ 

Պատասխանն ակնթարթորեն ստիպել է ավտոսիրողներին թռչկոտել հիացմունքից։ Թեեւ նշված Cadillac-ն ամենաարագ կամ ամենաթանկ մեքենան չէ, որը կարելի է գնել փողով, դա հիրավի հրաշք մեքենա է։ Այն Cadillac-ի ինժեներական մտքի գագաթն է՝ շքեղության, արտադրողականության եւ մրցավազքի հնարավորությունների տեսակետից։ 

2022 թ-ին թողարկված մեքենան երբեւէ ստեղծված ամենահզոր Cadillac-ներից մեկն է, որը կարող է մրցակցել այնպիսի մեքենաների հետ, ինչպիսին են BMW M5-ը եւ Mercedes-AMG E63-ը։ Այն ունի 6,2 լիտրանոց V8 շարժիչ, 668 ձիաուժ։ Թեեւ Ցուկերբերգի մեքենաների հավաքածուի մասին քիչ բան է հայտնի, տեղեկացվել է, որ մի քանի տարի առաջ նա գնել է Pagani Huayra-ն՝ 3 մլն դոլարով։ 

Աղբյուրը`  News.am