Զելենսկու «հաղթանակի ծրագիրը», հավանաբար, կախված է կա՛մ ՆԱՏՕ արագացված մուտքից, կա՛մ անվտանգության երաշխիքներից

Ավելի քան մեկ շաբաթ է անցել այն պահից, երբ Ուկրաինայի նախագահ Վլադիմիր Զելենսկին ԱՄՆ բարձրաստիճան պաշտոնյաներին ներկայացրեց Ռուսաստանի հետ պատերազմը դադարեցնելու իր «հաղթանակի ծրագիրը», սակայն ռազմավարության մանրամասները և այն, թե ինչպես է այն ընկալվել, մնում են անորոշ, իսկ Կիևը փորձում է լրացուցիչ միջազգային աջակցություն ստանալ ԱՄՆ նախագահական ընտրություններից ընդամենը մեկ ամիս առաջ, գրում է The Washington Post-ը։

Ինչպես ընդգծում է ամերիկյան լրատվամիջոցը, Զելենսկու վարչակազմը մինչ այժմ գաղտնի է պահել «հաղթանակի ծրագրի» կետերը, որոնք ներկայացրել է ԱՄՆ նախագահ Ջո Բայդենին և այլ բարձրաստիճան պաշտոնյաներին, սակայն այս ծրագիրը, հավանաբար, կախված է կա՛մ ՆԱՏՕ արագացված մուտքից, կա՛մ արևմտյան գործընկերների կողմից Ուկրաինայի անվտանգության պարտադիր երաշխիքներից։ 

Ուղևորությունը, որը ուկրաինացի պաշտոնյաների կողմից դիտվում էր որպես Վլադիմիր Զելենսկու համար առանցքային հնարավորություն՝ համոզելու Միացյալ Նահանգներին, թե ինչպես աջակցել Ուկրաինային ապագայում, Վաշինգտոնում արձագանք չի գտել, նշում է The Washington Post-ը։

«Բայդենը հավատարիմ մնաց Ռուսաստանին հարվածելու համար ԱՄՆ-ի տրամադրած մեծ հեռահարության հրթիռների կիրառումն արգելելու իր դիրքորոշմանը, և Զելենսկին հայտնվեց քաղաքական խաչաձև կրակի տակ, քանի որ նա հիմնականում քննադատվում կամ արհամարհվում էր ազդեցիկ հանրապետականների կողմից: Նախագահի հանրապետական թեկնածու Դոնալդ Թրամփի հետ հանդիպումը, որը Զելենսկու համար առաջինն էր պատերազմի սկզբից ի վեր, տեղի ունեցավ հապշտապ այն բանից հետո, երբ Թրամփն ի սկզբանե ասաց, որ չի պատրաստվում հանդիպել:

Միևնույն ժամանակ, ԶԼՄ-ն պնդում է, որ Զելենսկու գործողությունները Միացյալ Նահանգների նկատմամբ մեծացրել է տագնապալի անորոշությունը, որում այժմ հայտնվել է Ուկրաինան. նա ապավինում է ԱՄՆ-ին՝ որպես իր գլխավոր դաշնակցի, որը զինում է նրան Ռուսաստանի դեմ, բայց վստահ չէ, թե որքան ժամանակ կտևի այդ աջակցությունը, քանի որ պատերազմի նկատմամբ ուշադրությունը թուլանում է երրորդ տարում և Մերձավոր Արևելքում նոր էսկալացիայի պատճառով:

Սակայն, գրում է ամերիկյան լրատվամիջոցը, Զելենսկին իր հաղթանակի ծրագիրը ներկայացնելու ևս մեկ հնարավորություն կունենա հաջորդ շաբաթ Գերմանիայի Ռամշտայնում Ուկրաինայի պաշտպանության կոնտակտային խմբի հանդիպմանը, որին կմասնակցի ԱՄՆ նախագահը։

Այն բանից հետո, երբ Զելենսկին չկարողացավ հասնել հրթիռային սահմանափակումների վերացմանը, Կիևը կարող է այլ օգնություն ստանալ Գերմանիայում կայանալիք համաժողովի ժամանակ, հայտարարում է պարբերականը՝ վկայակոչելով արևմտյան դիվանագետին:

News.am

Այս թեմայով Տարածքների շուրջ «առևտուր» չի լինելու. Զելենսկի ՆԱՏՕ-ի հետ մենք ձգտում ենք հասնել և առաջ տանել տարածաշրջանային անվտանգությունը․ ՀՀ ԱԳՆ Նոբելյան մրցանակի ցուցակում է նաեւ Վլադիմիր Զելենսկին Անդրանիկ Քոչարյանը գործուղվում է Մոնրեալ․ կմասնակցի ՆԱՏՕ-ի խորհրդարանական վեհաժողովի նստաշրջանին ՆԱՏՕ-ի նախկին գլխավոր քարտուղարի դեմ դատական ​​հայց է ներկայացվել