«Միլթոն» արևադարձային փոթորիկը մոտենում է Ֆլորիդային և սպառնում վերածվել հզոր փոթորկի

Կիրակի օրը ԱՄՆ Ֆլորիդա նահանգի բնակիչները ծանուցում են ստացել, որ «Միլթոնը», որը ներկայումս սոսկ արևադարձային փոթորիկ է Մեքսիկայի ափերի մոտ, կարող է արագորեն ուժգնանալ և վերածվել մեծ փոթորկի, նախքան շաբաթվա կեսին Մեքսիկական ծոցի ափին հարվածելը։

«Միլթոն» արևադարձային փոթորկի կենտրոնը կիրակի վաղ առավոտյան գտնվում էր Ֆլորիդա նահանգի Թամփա քաղաքից մոտ 1385 կիլոմետր հարավարևմուտք և շարժվում է դեպի արևելք՝ 7 կմ/ժ արագությամբ, կայուն առավելագույն 95 կմ/ժ քամու պայմաններում, հայտնում է Մայամիի փոթորիկների ազգային կենտրոնը:

 «Միլթոնը դանդաղ է շարժվում, բայց ակնկալվում է, որ այն արագորեն կուժգնանա,- հայտնել են կենտրոնից:- Աճում է այն բանի համոզվածությունը, որ հզոր, կյանքին սպառնացող փոթորիկն այս շաբաթվա կեսերին կհարվածի Ֆլորիդայի արևմտյան ափի որոշ հատվածների»:

Ֆլորիդայի նահանգապետ Ռոն Դեսանտիսը 35 շրջաններում արտակարգ դրություն է հայտարարել փոթորկի հնարավոր ցամաք դուրս գալուց առաջ: Քանի որ այս շրջաններից շատերը դեռ վերականգնվում են «Հելեն» փոթորկից, Դեսանտիսը Ֆլորիդայի Արտակարգ իրավիճակների կառավարման և Ֆլորիդայի տրանսպորտի վարչությանը խնդրել է համակարգել բոլոր առկա ռեսուրսները և անձնակազմը՝ օգնելու տեղական համայնքներին արագացնելու աղբի մաքրումը:

Փոթորիկների կենտրոնը հայտնել է, որ Մեքսիկայի Յուկատան թերակղզին, Ֆլորիդայի թերակղզին, Ֆլորիդա Քիզը և Բահամյան կղզիների հյուսիս-արևմուտքը պետք է հետևեն համակարգերի զարգացմանը: Հորդառատ անձրևներ էին սպասվում կիրակի օրը բուն փոթորիկից առաջ, և այնուհետև, հավանաբար, Միլթոնում տեղումներին զուգակցված կհանգեցնեն Ֆլորիդայում ջրային ուղիների ու փողոցների հեղեղմանը, որտեղ, ըստ օդերևութաբանների կանխատեսմամբ, լույս չորեքշաբթի գիշերը տեղ-տեղ կարող է մինչև 30 սմ տեղումներ լինել:

«Ֆլորիդայի թերակղզու արևմտյան ափի որոշ հատվածների համար մեծանում է կյանքին սպառնացող փոթորկի և քամու ազդեցության վտանգը, որը սկսվելու է երեքշաբթի ուշ երեկոյան կամ չորեքշաբթի օրը: Այս շրջանների բնակիչները պետք է համոզվեն, որ փոթորկի դեպքում իրենք ծրագիր ունեն, հետևեն տեղական պաշտոնյաների բոլոր խորհուրդներին և իրազեկ լինեն կանխատեսումների թարմացումներին», - ասվում է կենտրոնի հաղորդման մեջ:

News.am