«Էմիլին Փարիզում» սերիալը Մակրոնի և Հռոմի քաղաքապետի միջև լարվածության պատճառ է դարձել

Ֆրանսիայի նախագահ Էմանուել Մակրոնը գովել է իր կնոջը՝ Բրիջիթ Մակրոնին՝ «Էմիլին Փարիզում» սերիալի չորրորդ եթերաշրջանում նկարահանելու համար։ Այս մասին նա ասել է Variety-ին տված նոր հարցազրույցում։  

Մակրոնի խոսքով՝ ինքը «շատ հպարտ է» իր կնոջով, և շատ ուրախ է հայտնի նախագծին նրա մասնակցությամբ։ «Դա [տեւեց] ընդամենը մի քանի րոպե, բայց կարծում եմ, որ շատ հաճելի էր նրա համար: Եվ կարծում եմ, որ դա լավ է Ֆրանսիայի իմիջի համար»,- ասել է նա:

Հարցին, թե ինչու իրեն չեն հրավիրել էպիզոդային դեր խաղալու, նախագահը պատասխանել է. «Ես այնքան գեղեցիկ չեմ, որքան Բրիջիթը»:

Սեպտեմբերի կեսերին Netflix սթրիմինգային ծառայությունը հայտարարեց սերիալը հինգերորդ սեզոնով երկարաձգելու մասին, որի սյուժեն ծավալվելու է Հռոմում։ Մակրոնը խոստացել է Ֆրանսիայի մայրաքաղաք վերադարձնել սերիալի հերոսուհուն։

«Մենք մեր ամբողջ ուժով կպայքարենք։ Մենք նրանց կխնդրենք մնալ Փարիզում։ «Էմիլին Փարիզում» Հռոմում իմաստ չունի»,- ասել է Մակրոնը։

The Hollywood Reporter Roma-ի հետ զրույցում Հռոմի քաղաքապետ Ռոբերտո Գուալտիերին ասել է Մակրոնին, որ «ընդունված չէ վախեցնել կամ միջամտել Netflix-ի ծրագրերին» և ֆրանսիացի առաջնորդին խորհուրդ է տվել «հանգստանալ»։