Լուրերը սուտ են, կրկեսի շենքը մնալու է՝ որպես կրկեսի շենք. Սոս Պետրոսյան․ 168.am

Տևական ժամանակ է՝ լուրեր են շրջանառվում, որ Երևանի կրկեսի շենքը, որի բացումը սարերի հետևում չէ, շուտով վերածվելու է առևտրի կենտրոնի։

Երևանի կրկեսի գեղարվեստական ղեկավար, պրոֆեսոր Սոս Պետրոսյանը 168.am-ի հետ զրույցում հերքեց այս լուրերը, ընդգծելով՝ շրջանառվող լուրերն իրականությանը չեն համապատասխանում։

«Ինքս՝ որպես կրկեսի գեղարվեստական ղեկավար, ասում եմ՝ լուրերը սուտ են, կրկեսի շենքը մնալու է՝ որպես կրկեսի շենք։ Ամեն ինչ արվում է, որ շենքն իր դռները շուտ բացի այցելուների առջև։

Ես շնորհակալ եմ «Տաշիր գրուպ» ընկերությանը, որ ամեն ինչ անում են, որպեսզի կրկեսի շենքը վերականգնվի։ Կրկեսում ամեն օր ճարտարապետը, շինարարներն աշխատում են, կարող եք գնալ ու ինքներդ համոզվել»,- նշեց Սոս Պետրոսյանը։
Ըստ Սոս Պետրոսյանի՝ կրկեսի շենքի աշխատանքներին զուգահեռ, իրենք ձեռքները ծալած չեն նստում՝ մասնակցում են տարբեր մրցույթների, փառատոների ու աշխարհում ներկայացնում են Հայաստանի կրկեսային արվեստը։

«Ես նոր եմ վերադարձել Մոսկվայից, որտեղ Նիկուլինի կրկեսում անցկացվեց մեծ կրկեսային փառատոն։ Ինքս փառատոնի պատվավոր հյուրն էի և կարծում եմ՝ հավուր պատշաճի ներկայացրեցի Հայաստանի կրկեսային արվեստը։

Առաջիկայում՝ հոկտեմբերի 16-22-ը, Հռոմում տեղի է ունենալու աշխարհի լավագույն կրկեսային մրցույթներից մեկը, ինձ հրավիրել են՝ որպես պատվավոր հյուր։ Այնտեղ մրցութային ծրագրով հանդես է գալու նաև իմ թոռը՝ Սոս Պետրոսյանը։ Բացի ելույթից, նա վարելու է նաև ամբողջ փառատոնի ծրագիրը երեք լեզվով՝ իտալերեն, ֆրանսերեն ու անգլերեն։ Հավատացած եմ, որ նա մրցութային ծրագրում բարձր կարգի տեղ կգրավի»,- հավելեց Ս. Պետրոսյանը։

Նա նաև տեղեկացրեց, որ նոյեմբերի 9-ին Երևանի Հակոբ Պարոնյանի անվան պետական թատրոնում Լեոնիդ Ենգիբարյանի անվան ստուդիայի շրջանավարտները հանդես կգան կրկեսային ներկայացմամբ։

«Սա հաշվետու ներկայացում է՝ բարեգործական։ Այնպես որ, մենք շարունակում ենք աշխատել»,- եզրափակեց Սոս Պետրոսյանը։